Мегьарамдхуьруьн райондин Бут-Къазмайрин хуьруьн библиотекада, Дагъустан Республикадин культурадин лайихлу работник Мегьамедов Айдун кьиле аваз, библиотекарь Мирзеагъаева Жавгьарата Россиядин писателрин Союздин член, бажарагълу шаир Исмаилов Агъаларан яратмишунриз талукьарнавай межлис кьиле тухвана.
Ада къейд авурвал, Исмаилов Агъаларан “Сифте муьгьуьббат”, “Кимин къванер”, “Йифиз кIватIай чиг”, “Уьмуьрдин мензилар”, “Мураддин мурз” ктабри чи умуми медениятда кьетIен чка кьазва.
Хуьруьн жегьилри, агъса-къалри, вахт хьайила, адан шиирар кIелзава ва менфят хкудзава.
Межлисдал рахай, аял чIавалай санал чIехи хьайи ва чпин дуствал садрани квадар тийизвай Саидов Селима, некIедин стха Саидов Эседуллагьа, школадин муаллимар тир шаир Агьмедов Мукаила, Желилов Желила ва масабуру шаирдин уьмуьрдикай гегьенш суьгьбетар авуна.
Школадин лезги чIалан ва литературадин тарсар тухузвай муаллим Букарова Фатумади школада кIелзавай аялрихъ галаз санал шаирдин шиирар ва шаирдиз бахшнавай шиирар кIелна. Хуш келимаяр хуьруьнвияр тир Букарова Халисата, Ризаева Бикеханума ва масабуруни лагьана…
Вичин нубатда шаир Исмаилов Агъалара гуьруьш тешкилайбуруз чухсагъул малумарна, шиирар кIелна ва алай вахтунда квел машгъул ятIа лагьана.
— Зун гзаф шад я зи жемятдилай заз лезги чиликай, чIалакай пай ганва лагьана. Лезги чилел за муг эцигна, багъ кутуна ва гьар йисуз, уьмуьрдин юлдаш ва хтулар галаз ял ягъиз, лезги чилел хквезва. Кьвед лагьай мертебадин пенжердин вилик ацукьна чай хъваз за, багъдиз килигиз, цIийи шиирар яратмишзава, ахпа эвичIна багъдин бегьер кIватI хъийизва. За жуван лезги чилел, лезги чIалал дамахзава, абур зи берекатар я, — къейдна А.Исмаилова.
Салманов Усмана кларнет, Саидов Ревшана чIагъан, Бабаев Илагьудина далдам, Мегьамедов Айдуна саз ягъуналди, медениятдин кIвалин художественный самодеятельностди хъсан концерт гана.
Эхирдай межлис чайдин столдихъ давам хъхьана.
Желил Желилов,
муаллим
