«Кавказдин Иерусалим» — Дербентда

6-апрелдиз Дербент шегьерда «Гележегдиз чар – 2125» арт-объект шад гьалара ачухуниз ва гьа чарар тунвай къаб гележегдин динрин макандин дараматдин хандакIда туниз талукьарнавай зурба мярекат кьиле фена. Ам Дагъустан Республикадин Кьил Сергей Меликовани сенатор Сулейман Керимова ачухна.

Регион патал лишанлу вакъиа шегьердин «Кьиблепад» микрорайонда эцигиз гъиле кьунвай алай аямдин майдандал кьиле фена. Ана Россиядин Федерациядин Президентдин Администрация­дин кьилин заместитель Владимир Островенкова, Сергей Меликова, Сулей­ман­ Керимова, Москвадин Муфтий Ильдар Аляутдинова, Россиядин чувудрин махлукьатдин Федерациядин кьилин рав­вин Берл Лазара, Арабрин Сад Авунвай Эмират­рин дипломатри, Дагъустандин диндин регьберри, дяведин махсус серенжемдин иштиракчийри, жегьилрин  тешкилатри ва шегьерэгьлийри иштиракна.

Шадвилин мярекат, адет тирвал, мугь­манар фалдини кьелелди ва чкадин­ ширинлухралди къаршиламишунилай баш­ламишна.

КIватI хьанвайбурун вилик тебрикдин гафар Сергей Меликова лагьана. Ада динрин арада алакъаяр мягькемарунин ва региондин тарихдин ирс хуьнин жигьетдай и проектдихъ авай метлеблувиликай лагьана.

«Къенин мярекат шадвилин ва шукурдин йикъара кьиле тухунин метлеб екеди я. Лап и мукьвара мусурманрин алемди сив хуьнин сувар къейдна. Гила вилик Пейсахидин ва Пасхадин экуь суварар ква…», — къейдна Сергей Мели­кова.

Региондин Кьили республикада ислягьвал ва меслятвал хуьнин кардик еке пай кутазвай Дагъустандин диндин регьберриз сагърай лагьана.

Сергей Меликован фикирдалди, диндин центр эцигун неинки руьгьдин, гьакI экономикадин жигьетдайни Дагъустан патал важиблу я. Ада, вичел гзаф кьадар туристар желбдай хьиз, республикадиз инвесторарни гъида. Диндин макан арадал гъун Сулейман Керимован фикирдиз атана. Ада зурба дарамат эцигунин харжиярни вичин хивез къачузва.

Диндин макан зурбади, мискIидикай, килисадикай, синагогадикай ва алай аямдин гегьенш паркуникай ибарат жеда. ЧIехи дарамат эцигзавай майдан 35 гектардиз барабар я. МискIиндал 88 минара жеда, чебни 88 метрдив агакьда. Дарамат Дагъустанда виридалайни кьакьанди жеда. И комплексдихъ са шумуд музей,­ библиотека, конференц-зал жеда. Адан патав туристрин автобусар акъваздай кьилдин чка тайинарнавай автостанциядини кIвалахда. Ина гьакI агьалияр ва аялар патал ял ядай кьилдин чкаярни туькIуьрда.

Дербентда шадвилелди ачухай мярекатда иштиракиз Россиядин регионрай ва къецепатан уьлквейрай тIвар-ван авай хейлин инсанар атанвай. Абурун арада авай: Россияда ОАЭ-дин векил Мугьаммад Аль-Жабер, ОАЭ-дин диндин крарин рекьяй кьилин управленидин председатель Омар Аль-Дерей ва адан куьмекчи Аль-Ханаи Анвар Салем, ОАЭ-дин векилханадин секретарар тир Иса Ихаб ва Рашид Аль-Яммахи.

Мярекатда кIватI хьанвайбурун вилик меценат Сулейман Керимовни рахана:

— Сифте нубатда за къени крар ийиз­ мумкинвал гузвай сад тир Аллагьдиз регьим ийизва. ГьакI чи уьлкведин Президентдизни сагърай лугьуз кIанзава. Чун, миллетриз, динриз килиг тавуна, вири­ адан патав кIватI хьанва ва чна са крар ийизва. Зун вири миллетрив, динрив стхавилелди эгечIдай руьгьдаллаз тербияламишай жуван Дербент шегьердин­ агьалийриз, абурухъ галаз сад хьиз Да­гъустандин вири агьалийризни рикIин сидкьидай сагърай лугьуз кIанзава.

Сенаторди ОАЭ-дин президент Шейх Мугьаммед бен За-идан тIварцIихъни хъсан гафар лагьана. И важиблу проект кьилиз акъудуник адани вичин пай кутадайвал я.

«Чун хейлин вахтунда мискIинрин проектриз килигна. Нетижада Абу-Даби­да эцигнавай мискIиндал акъвазна. Дербентда гьадаз ухшар дарамат эцигунин гьакъиндай фикир авайди ОАЭ-дин Президентдиз лагьайла, ада неинки ихтияр гана, гьакI проект уьмуьрдиз кечирмишунин карда иштиракдайдакайни малумарна. И карди чак мадни руьгь кутуна», — лагьана Сулейман Керимова.

Комплекс жедай майдандал «Гележегдиз — чар» арт-объектни ачухна. Гележегдиз Сергей Меликовани­ Сулейман Керимова чпин фикирар кхьен­вай къабни хандакIда туна. Ам анай 2125-йисуз ахкъудда.

Хийир Эмиров