РД-дин кьил В.Васильеван теклифдалди кардик кутунвай «Къацу километрияр» серенжем 30-мартдиз Ахцегь райондини кьабулна. Идакай «Лезги газетдиз» райадминистрациядин пресс-къуллугъди хабар гузва.
Райондин кьил Осман Абдулкеримован тапшуругъдалди вири идарайрин къуллугъчияр райондин умуми субботникдиз экъечIна. Райондин депутатрин Собранидин председателдин регьбервилик кваз, райондиз гьахьдай тагъ алай чкадилай эгечIна, «Агъасиеван тIварцIихъ галай колхоз» СПК-дин мулкарал кьван шегьре рекьин къерех абадвилихъ тухунин кIвалахар кьилиз акъудна. Идалайни гъейри, мулкар къацу авунин кIвалахар чкайрални – гьар са идарадин гьаятрани кьиле фена. Жемиятдин тешкилатри, идарайрин къуллугъчийри мулкар зирзибилрикайни михьна.
Чешмеди къейдзавайвал, серенжем кьилиз акъудунин сергьятра аваз 1000-далайни гзаф емишрин ва гьамиша къацу жедай тарарин къелемар цана.
«Лезги газет»
