— Катар Мукьвал тир РагъэкъечIдай пата, Катардин полуостровда авай арабрин гъвечIи уьлкве я. И уьлкведиз анжах Саудовский Аравиядихъ галаз сергьят ава.
— Чил бегьер тагудайди ятIани, тIебиатдин девлетлувили катарвийриз уьлкве лап къулай чкадиз элкъуьрдай мумкинвал ганва.
— И уьлкведин умуми майдан 11586 квадратный километрдикай ибарат я. Ана 2 миллионни 660 агъзурдалай гзаф ксар яшамиш жезва.
— Катардин девлетлувал нафтIадихъни тIебии газдихъ галаз алакъалу я.
— Катар монархия авай уьлкве я. Конституциядин чкадал — Шариат.
— Государстводин меркез Доха шегьер я.
— Катардин мулкарин чIехи пай бегьер тагудайди, са затIни экъечI тийидайди я. Уьлкведа кьел квачир яд бес жезвач. Гьавиляй катарвийри, гьуьлуьн цин уьцIуьвал хкудна, ам хъваз жедайвал ийизва. Кьитвал авайвиляй ана хъвадай михьи цин къимет “Кока-коладилай” багьа я.
— Катарда сиясатдин партияр авач -абурал кIевелай къадагъа ала.
— Уьлкведа гьава гзаф чимиди я. Гатун вахтунда чимивал гагь-гагь 50 градусдив агакьда. Марфар лагьайтIа, йисан къене анжах са шумуд сеферда къвада.
— Катарда яшамиш жезвай агьалийрикай анжах 20 процент анин ватандашар я. Муькуьбур лагьайтIа, — Индиядай, Филиппинрай ва масанрай атанвай къецепатан уьлквейрин фялеяр.
— Меркезда, Дохада, жемиятдин улакьар саки авач. Метрони авач, автобусар лагьайтIа, гагь-гагь къекъведа. Инсанри санай масаниз фин патал асул гьисабдай таксидикай менфят къачузва.
— Са гьихьтин ятIани митинг ва ихьтин маса мярекат тухунал ана къадагъа эцигнава, ихьтин гьерекатдай дустагъда ацукьарун мумкин я.
— Катардин агьалийри незвай суьрсетар вири маса уьлквейрай гъизва. Уьлкведихъ вичихъ хсуси хуьруьн майишат авач.
— Чкадин пулуниз “катардин риал” лугьузва.
— Уьлкведа араб чIал кьилинди я. Амма агьалийрин анжах 40 процент арабар я. Жегьилар араб ва ингилис чIаларал рахазва.
Катарда ички официальный къайдада къадагъа авунва. Туьквенрай ички эсиллагь маса гузвач.
«Лезги газет»
