Сулейман-Стальский райондин кьил Нариман Абдулмуталибова Кьасумхуьруьн 2-нумрадин СОШ-дин цIийи дарамат иш­лемишиз вахкун патал гьазурвал акунвай гьал, чкадал фена, ахтармишна.

150 ученикдиз чкаяр жедай мектебдин алай аямдин кьве мертебадин  дарамат республикадин махсус “2009-2018-йисара РФ-дин залзалайрин хаталувал авай районра  яшайишдин кIвалер, яшайишдин шартIар таъминардай асул имаратар ва системаяр саламатбур хьунин дережа хкажун” программадин бинедаллаз эцигнавайди я. Имарат эцигунин заказчи яз РД-дин эцигунрин ва ЖКХ-дин министерстводин залзалайрикай хатасуз ийидай центр ГАУ ва пудратчи яз “Дагстройсервис” ООО майдандиз экъечIна. Эцигунрин кIвалахар 2018-йисуз гъиле кьуна.

Мектебда ерилу чирвилер гун патал вири шартIар яратмишнава. Дараматдихъ столовой, чIехи спортзал, футбол, волейбол ва баскетбол къугъвадай майданар гала. Гьар са мертебада ял ядай чкаярни туькIуьрнава. Классра партаяр, учебный пособияр патал шкафар эцигнава, столовой, хуьрекар гьазурдай чкаяр ва спортзал тадаракламишнава.

Мектебдин дараматдиз ва адан къваларив гвай чкайриз килигайдалай гуьгъуьниз райондин кьили энгел тавуна арадай акъудун лазим тир са жерге кимивилерни къалурна. Кьилди къачуртIа, и кар имарат ишлемишиз вахкун патал документация гьазуруниз, чирвилер гудай идарадиз лицензия къачуниз, мектебдин къваларив гвай чкаяр аваданламишуниз, инженерный къурулушар пайгардик кутуниз талукь я. “И мукьвара районда алай аямдин мад са мектеб ишлемишиз вакхуда. Им райондин уьмуьрда лап важиблу вакъиа я. Вири кIвалахар чешнелудаказ тамамарун, аваданламишунихъ, классрин кIвалер тадаракламишунихъ галаз алакъалу вири месэлаяр, куьлуь-шуьлуьярни кваз, вилив хвена кIанда.  1-сентябрь алукьдалди вири тадаракар кIвалахда ахтарми­шун герек я”, — къейдна Н.Абдулмуталибова.

Райадминистрациядин талукь тир къурулушриз ва мектебдин директордиз авай кимивилер арадай акъудунин патахъай тапшуругъар гана.

«Лезги газет»