1-сентябрдиз Сулейман-Стальский районда Кьасумхуьруьн цIийи школа ачухунин мярекат кьиле фена. Идан гьакъиндай “Лезги газетдиз” муниципалитетдин администрациядин пресс-къуллугъди хабар гана.
Алидхуьр микрорайонда аваз хьайи куьгьне мектеб гьеле 1946-йисуз накьвадин керпичрикай эцигайди тир. 1966-йисуз адан къвалав щитрикай кIватIзавай кьвед лагьай имарат хкажна. Кьве дараматни чкIидай гьалдиз атанвай.
ЦIийи мектебдин бинеда сифтегьан къван 2018-йисан 27-августдиз тунай. 150 кас ученикар патал чкаяр авай мектебдин цIийи дарамат “2009-2018-йисара Россиядин Федерациядин залзалайрин хаталувал авай районра яшайишдин кIвалер, яшайишдин шартIар таъминардай асул имаратар ва системаяр саламатбур хьунин дережа хкажун» федеральный махсус программадин бинедаллаз эцигнавайди я. Проектдинни сметадин документация меценатрин пулдин такьатрин гьисабдай гьазурна.
Мектеб ачухунин мярекат шадвилин гьалара кьиле фена. Мектебдиз гьахьдай чкадал аниз физвайбурал ифин алатIа ахтармишна, санитариядин серенжемар кьиле тухвана, гьакIни маскаяр пайна. Мярекатда ученикри, хуьруьн агьалийри, муаллимри ва гьуьрметлу мугьманри иштиракна. Мугьманрин арада РД-дин Гьукуматдин Председателдин заместитель Рамазан Жафаров, РД-дин Халкьдин Собранидин образованидин, илимдин, культурадин, жегьилрин крарин, спортдин ва туризмдин рекьяй Комитетдин председателдин заместитель, РД-дин Халкьдин Собранидин депутат Гьамидуллагь Мегьамедов, РД-дин гражданвилин оборонадин крарин, кьетIен гьаларин ва тIебиатдин бедбахтвилерин чIуру нетижаяр арадай акъудунин рекьяй министрдин заместитель Надим Велиханов, РД-дин Кьилин ва Гьукуматдин инновационный проектрин управленидин начальник Арсен Рустамов авай.
Мектебдин аялри мугьманар фуни-кьел гваз вилик экъечIуналди тебрикна. Гуьгъуьнлай аялри шиирар кIелна, музыкадин нумраяр тамамарна ва кьуьлерна.
Шадвилин мярекатдин иштиракчийрихъ ва мугьманрихъ элкъвена, рахай Рамазан Жафарова, кьилди къачуртIа, лагьана: “Заз квев республикадин Кьил Владимир Васильеван, Гьукуматдин Председателдин везифаяр вахтуналди тамамарзавай Анатолий Къарибован патай сагъламвал, хушбахтвал, кIелунра агалкьунар хьана кIанивилин келимаяр агакьариз кIанзава. Чирвилерин йикъахъ галаз алакъалу яз мектебар ачухунин мярекатар кьиле тухун хъсан адет хьанва. Къе, и гуьзел имаратдилай гъейри, республикада мадни 8 мектеб ачухзава. Йисан эхирдалди 22 мектеб ишлемишиз вахкудайвал я. Сулейман-Стальский районди Дагъустандиз ва Россиядиз тIвар-ван авай хейлин алимар, духтурар, педагогар, военачальникар ва маса рекьерайни пешекарар багъишна. Зун инанмиш тирвал, къе и мектебдиз физвай аялри чIехи несилди кутур хъсан адетар давамарда”.
Гьукуматдин Председателдин заместителди къейд авурвал, Владимир Васильеван тапшуругъдалди и йикъара Кьасумхуьруьн 2-нумрадин СОШ-див аялар тухудай цIийи автобус агакьарда.
“Къе и школади 194 аял кьабулзава. Абурукай 24 кас 1-классдиз физвайбур я. Алай вахтунда районда мад кьве школа, Алкьвадрал ва Агъа СтIалрин-Къазмайрал, эцигзава. Вири ибур республикадин Кьил Владимир Абдуалиевич Васильева куьмек гунин нетижада ийиз хьанвай крар я. За виридаз сувар мубаракзава. Диде — бубайрик анжах шадвилин, чпин веледрал дамахунин гьиссер акатрай. Регьятбур тушир шартIариз таб гуналди, райондин образованидин система лазим тир дережада аваз хуьзвай чи педагогриз сагърай лугьуз кIанзава заз!”, — малумарна кIватI хьанвайбурун вилик тебрикдин келимаяр рахай Нариман Абдулмуталибова. Пишкеш яз, райондин кьили мектебдин директордив векь ядай алат (газонокосилка) вахкана.
Гьамидуллагь Мегьамедов аялриз тербия ва чирвилер гунин месэлайрал акъвазна: “Заз Алидхуьруьн куьгьне школа мукьувай чида. Аял чIавуз зун аниз хейлин сеферра акъатайди я. И мектеб кIелайбурукай гьуьндуьр дережадин юристар, экономистар, педагогар ва маса пешекарар хьунал зун шад я. Эминхуьре 440 ученикдиз чкаяр авай лап вижевай мектеб ишлемишиз вахканва. Къе чна и мектеб ачухзава. Районда мад кьве мектебдин дараматар эцигзава. Вири ибур республикадин кьиле авай ксари куьмек гунин нетижада арадал атанвай крар я. Гьуьрметлу педагогар ва диде-бубаяр, къуй и мектеб акьалтIардайбурукай савадлу ва медени ксар, гележегда алимар ва академикар хьурай”.
Шадвилин мярекатдал мектебдин директор Мамед Велиев, Зегьметдин баркалладин ордендин сагьиб, мектебдин бинеда сифтегьан къван эцигай кас тир Велимет Керимов, педагогвилин зегьметдин ветеран Раиса Бабаевани рахана.
Абуру хуьруьв, райондив ихьтин савкьат — алай аямдин вири истемишунриз жаваб гузвай мектебдин цIийи дарамат агакьарунай республикадин Кьил Владимир Васильеваз ва райондин регьберриз сагърай лагьана.
Велимет Керимова Ватандин ЧIехи дяведин ва адалай гуьгъуьнин йисара гьалтай четинвилерикай, а вахтарин педагогдин акьалтIай агъур зегьметдикай ихьтин келимаяр лагьана: “Итимар фронтда авай, зегьметдин вири агъур пар чи дидейрал, яшлу ксарал гьалтна. Чна колхоздин патав ва махсусдаказ туькIуьрнавай маса кIвалера кIелна. Педагогар маса хуьрерай ракъурзавай ва абурун кIвалахдин шартIар лап агъурбур тир. Гьавиляй районда цIийи мектебар эцигзавайди вилериз акун рикI лап шадардай кар я”.
Мярекатдин эхирдай, яру лент атIуналди, Нариман Абдулмуталибов мугьманарни галаз мектебдин дараматдин къенез гьахьна.
«Лезги газет»
