Чи ватанэгьлияр — гьар сана
Духтурвилин пеше хкязавайбурун кьилин шартI гележегда кIвалахдив анжах рикI гваз эгечIун я. Неинки и шартIунал, гьакI талукь тир маса къайдайрални амалзавай, пешедал кьарудаказ зегьмет чIугвазвай жегьил хирург-духтур я и мукьвара зун вичихъ галаз таниш хьайи Даир Мегьамедагъаев.
Чаз чизвайвал, алай вахтунда Краснодарда яшамиш жезвай лезгийрин кьадар гзаф я. Абурун жергеда хъсан духтурар, алимар, муаллимар, карчияр, общественный деятелар ва миллетдин тIвар хкажзавай лайихлу ксарни артух я. Даир Маратович Мегьамедагъаевни гьахьтинбурукай я. Адан ери-бине Кьурагь райондин Цилингрин хуьряй я.
Ам 1995-йисан 28-ноябрдиз Дербент райондин Агълабрин хуьре дидедиз хьана. Мектеб куьтягьайдалай кьулухъ 2013-йисуз Кубандин медицинадин госуниверситетдик экечIна. 2016-йисуз, 4-курсуна кIелзавайла, медицинадин рекьяй тади куьмек гунин Краснодардин азарханада (БСМП) кIвалахал акъвазна ва ина 5 йисан муддатда пешедин рекьяй агалкьунралди тежриба кIватIна.
Университет акьалтIарайдалай кьулухъ хирургиядин рекьяй ординатурадик экечIна. Алай вахтунда Краснодардин 16-нумрадин поликлиникада ва БСМП-да кIвалахзава.
“Духтурвилин пеше хкягъун заз диде-бубади теклифна. Кьисметди зун Краснодардиз акъудна. Гьелбетда, инсандин сагъламвилин къаравулда акъвазунин кIвалах заз хуш я”, — лугьузва Даир духтурди.
Духтурдихъ галаз авур ихтилатрай малум хьайивал, медицинадин рекьяй, кьилди къачуртIа, операцияр авунин куьмекар герекзавай ватанэгьлийриз ада садрани ваъ лугьузвач, алакьдай куьмекар лезгийриз, гьакI санлай дагъустанвийриз гузва. “Ина, Краснодарда, медицина хъсан дережада ава, гьавиляй сагъламвилин гьал ахтармишунин, герек атайтIа, операцияр авунин жигьетдай ватанэгьлийриз куьмек гун за жуван буржийрикай яз гьисабзава”, — давамарна ада ихтилат.
Даир Мегьамедагъаев милли медениятдал, ватандал гзаф рикI алай инсан я. Адавай гьар йисуз садра-кьведра хайи хуьруьз хъфин тавуна акъвазиз жедач. Краснодарда яшамиш жезвай лезгийрихъ галаз ада дуствилин алакъаяр хуьзва, медениятдин мярекатра иштиракзава.
Жегьил духтурдихъ гележегда аспирантурадик экечIдай ва медицинадин илимдал машгъул жедай фикир ава. И рекьяй хъсан насигьатчиярни, кьилинди, мумкинвилерни аваз хьуни адак гьевес кутазва. Чаз кIанзавайдини ам вичин мурадрив агакьун я.
К.Ферзалиев
