—           Сивер акъатнавайла, чайдин пуд тIу­руна авай курквачI (мальва) хъчарал 2 истиканда авай ргазвай яд илична, 1,5-2 сятда та­да. Ахпа йикъа 3-5 сеферда сиве экъуьрда.

—           Кайи чкадивай, адет яз, инсанри семечкадин чIем гуьцIда. Амма и кар авун эсиллагь герек туш. Ада канвай чка мадни еке ийида. Канвай чка сифте къайи цик кутуна, ахпа анивай къазан запун гуьцIун меслят къалурзава.

—           Яру як, чранвай картуфар, газ квай ятар, кофе гзаф ишлемишзавай инсанар подагра азардик иллаки гзаф азарлу жеда. И хатасузвал тIимиларун патал емишар, салан майваяр, кIерецар ишлемишун меслят къалурзава. Абурук азардин вилик пад кьадай шейэр гзаф ква.

—           МетIер тIазвайла, чайдин са тIу­руна авай кьел, гьакьван сода, вирт ва 7 стIал йод вири сад-садак какадарна, метIел эцигна, чи­ми шарфуналди ку­тIун­да. Ахпа са 10-15 де­кьикьадилай чуь­хуьн хъийида. И процедура са шумуд юкъуз ийида.

—           Мукьвал-мукьвал кьил тIазвай­ла, са истиканда ицIи кака хана, винелай ргазвай нек илична, хуькуьрна, хъвада. Эгер са шумуд юкъуз ихьтин къаришма хъвайитIа, куь кьил яргъал вахтуналди тIа хъжедач.

—           Иммунитет хкажун патал агъадихъ галай рецептдикай менфят къа­чу­да:­ кIерецдин хвехвер, кишмишар, (гьар сад 300 г), кьурурнавай чIулав хутар — 30 г, хам аламай 3 лимон хъсандиз ­чуьхвена, як регъведай машиндай авадарна, ху­ь­куьр­на, 300 г вирт акадарна, холо­диль­никда хуьда. Ам йикъа пуд сеферда, фу нез 40 декьикьа амайла, чайдин кьве тIу­руна авайди ишлемишда. Ихьтин къаришмади беден сагъарда ва къуват гъида.

—           Далу  тIазвайла, хуьрекдин са тIу­руна авай вирт чими авуна, далудивай хъсандиз гуьцIна, полиэтилендалди кIе­вирна, винелай чими шарф алчукна, къаткида.

—           Серг гзаф азаррин дарман я. Ам дамарра ивидин гьерекат хъсанарун, иви кьери авун, тромбар тахьун патал гзаф хийирлу я. Дарман икI гьазурда: 250 г серг куьлуь авуна, гьакьван вирт алава хъувуна­, 7 юкъуз мичIи чкада эцигда. Ахпа варз­ни зуран вахтунда йикъа пуд сеферда хуьрекдин са тIуруна авайди фу недалди вилик ишлемишда.

—           Яшар хьанвай гзаф инсанрин зигьин зайиф жеда. И кардин кьилин себеб нервийрин системадилай аслу я. Зигьин хъсанарун патал гьар йикъан рациондик кьилин мефтIедиз ва вири бедендиз хийир­ авай продуктар (балугъ, семечкаяр, кIерецдин хвехвер, черника, куьк тушир малдин як) ишлемишун лазим я.

—           ЧичIекдин хъуьруьшри гзаф азарар сагъарда. Мекьи хьана, уьгьуьяр акатнавайла, хуьрекдин 2 тIуруна авай хъуьруьшрал 2 истиканда авай яд илична, 15 декьикьада ргада. Ахпа ам куьзна, йикъа  пуд сеферда, фу нез 40 декьи­кьа амайла, 1/3 истиканда авайди чимидаказ ишлемишда.

Мадни, туьтвер тIазвайла, хуьрекдин 2 тIуруна авай хъуьруьшрал са  истикан ргазвай яд илична, 40 декьикьада тада. Ахпа ам куьзна, йикъа пуд сеферда туьтуьна экъуьрда. ЧичIекрин хъуьруьшрин яд неинки микробрихъ галаз женг чIуг­вадай, гьакI дамарар мягькемардай ва бедендик квай артухан яд хкуддай такьатни я.

—           Гьатта гатузни гзаф инсанрин гъилер, кIвачер рекъида. И кардин себеб­ дамарра ивидин гьерекат агъуз, иви икьи, хьун гьакIни дамарра тромбар аваз хьун я. Ам агъуз аватнавайла, гьар юкъуз са истиканда авай кефирдиз 20 стIал коньяк­ яна хъвайитIа, дамарра ивидин гьерекат­ чкадиз хкведа.  Иви кьери хьун патал гьар юкъуз са литр ва адалай гзаф яд ишлемишун лазим я. Тромбар тахьун­ патал чIутран цуькверин ва тысячелистник хъчарин гьалимаяр хъунни меслятзава. Идалайни гъейри, незвай продуктрик куьк балугъ, вирт ва серг кутун хийирлу я.

Гьазурайди — Надият Велиева