17-сентябрдиз Каспийскди вичин 70 йисан юбилей къейдна. Шегьер арадал атайдалай инихъ 70 йис тамам хьуниз талукьарнавай шадвилин собранида Дагъустандин Кьил Рамазан Абдулатиповани иштиракна.
Каспийскдин агьалийрихъ ва мугьманрихъ элкъвена рахай Рамазан Абдулатипова, кьилди къачуртIа, шегьер ва республика патал “Дагдизель” заводдихъ гьихьтин метлеб аватIа къейдна: “Каспийск — им Дагъустандин тарихда цIийи шегьеррикай сад я. Ам 1932-йисалай кIвачел акьалтиз башламишна. Уьлкведин вири пипIерай атанвай пешекарри “Дагдизель” завод эцигунин карда активнидаказ иштиракна ва кархана вич арадал гъана. Гьакъикъатда им Вирироссиядин эцигунар тир. 1947-йисуз Каспийск шегьер хьиз арадал атана. Адан бине кутурбур ва адан сифтегьан агьалияр Ленинграддай атай проектировщикар ва рабочияр тир.
Къе “Дагдизель” агалкьунралди вилик физва. Алатай йисан нетижайри къалурзавайвал, производство кьве сеферда хкаж хьана. Са тIимил вахтар идалай вилик Дагъустандиз ахьтин завод герек авани лугьудай месэла кудзавайди тир. За гьисабзавайвал, кьилди къачуртIа, гьа и заводдин майдандал Дагъустан Республикада военно-промышленный комплекс вилик тухунин адетар давамарун герек я”.
Рамазан Абдулатипов шегьер вич вилик финикайни рахана: “Алай вахтунда Каспийск шегьерди республикадин майишатдин комплексда лайихлу чка кьазва, Дагъустан яшайишдинни экономикадин, культурадин жигьетдай вилик финик виле акьадай хьтин пай кутазва.
Пуд йис идалай вилик чна Каспийский флотилиядин штаб Астрахандай Каспийск шегьердиз хкунин теклиф ганай.
Уьлкведин Президентдин тапшуругъдалди РФ-дин оборонадин министерстводин коллегияди гьа ихьтин къарар кьабулна ва и барадай кIвалахдив эгечIнава.
Им Каспийск патал еке къулайвал я, вучиз лагьайтIа кIвалахдин гзаф кьадар чкаяр тешкилдай мумкинвал жеда ва ида стратегиядин жигьетдай уьлкведин важиблу регион яз Дагъустандихъ авторитет ва гьуьрмет авайди мад сеферда субутда”.
Мярекат кьиле физвай чIавуз государстводин шабагьарни вахкана. Каспийск шегьердин мэр Мегьамед Абдулаеваз гзаф йисарин гьакъисагъ зегьметдай “Дагъустан Республикадин вилик лайихлувилерай” орден, чешнелу зегьметдай “Дагдизель” заводдин ва Каспийскдин дуьм-дуьз механикадин заводдин работникриз медалар гана.
Каспийскдин образованидин деятелриз Дагъустан Республикадин гьуьрметдин грамотаяр ва “Дагъустан Республикадин лайихлу муаллим” лагьай гьуьрметдин тIвар гана.
Каспийскдин агьалийрин тIварцIихъ РФ-дин Госдумадин Председателдин заместитель, “Сад тир Россия” фракциядин руководитель Владимир Васильеван, РД-дин Халкьдин Собранидин Председатель Хизри Шихсаидован ва масабурун патай тебрикар агакьна.
Къейд ийин, Каспийск шегьердин юбилейдиз талукь мярекатра Мегьарамдхуьруьн райондин кьил Фарид Агьмедова, Россиядин халкьарин адетдин культурайрин центрадин коллективди, симинал къугъвадай пагьливанрин “Гьунар” дестедини иштиракна.
«Лезги Газет»
