Мукьвара чи ватандаш Зарема Къурбановна Омаровади Москвада РАН-дин базардин месэлайрин Институтда экономикадин илимрин докторвилин диссертация агалкьунралди хвена.

Алимди илимдин ахтармишунар “Формирование механизмов управления развитием корпоративных форм хозяйствования в промышленности” темадай кьиле тухвана.

Зарема Омаровадин илимдин консультант РАН-дин член-корреспондент, экономикадин илимрин доктор, профессор, “РАН-дин базардин месэлайрай Ин­ститут” ФГБУ-дин директор Валерий Анатольевич Цветков тир.

Заремадин ери-бине Кьурагь райондин Хпуькьрин хуьряй я. Ам 1978-йисуз дидедиз хьана. Махачкъаладин 38-гимназияда кIелна. Юкьван школа 1995-йисуз къизилдин медалдалди куьтягьна, ДГУ-дин эконо­микадин фа­культетдик экечI­на. Амни яру диплом къачуналди акьалтIар­на. Са йисалай аспирантурадиз гьахьна. 2004-йисуз Махачкъалада илимрин кандидатвилин диссертация хвена.

2008-йисалай З.Омаровадикай “РАН-дин базардин месэлайрай Институт” ФГБУ-дин, ах­па, Россиядин Г.В.Плеханован тIва­рунихъ галай экономикадин университетдин инсанрин ресурсар идара авунин рекьяй кафедрадин илимдин кар алай къуллугъчи хьана. Алай вахтунда Плеханован тIв­а­рунихъ галай­ РЭУ-да кIва­лахзава.

Илимдин рекьяй ахтармишунардайла, За­рема Къурбановнади “Инвестиционный потенциал сбережений населения: состояние, проблемы, приоритеты использования” (ИСЭИ ДНЦ РАН, 2004 г. 9,3 п.л.); “Корпоративная интеграция предприятий: вопрос теории и практики” (Изд-во “Наука плюс”, 2009 г.-20,2 п.л.) монографияр чапдай акъудна.  Ам “Россиядин­ регионрин экономический энциклопедиядин (Дагъус­тан Республика)” соавторни я (Изд-во­ “Экономика”, 2009-йис). Зарема Омарова гьакIни илимдин интересрин тематикадай кхьенвай, печатдай акъатнавай 90, гьа жергедай яз Россиядин кар алай (реферируемый) изданийриз акъатнавай 20 кIва­лахдин автор я. Бажарагълу алимди вирироссиядин ва международный илимдинни практикадин конференцийра, РФФИ-дин, (руководитель) РГНФ-дин (исполнитель) грантра, РАН-дин междисциплинарный программайра иштиракзава.

Зарема Къурбановна пуд веледдин диде я.

 

* * *

“Лезги газетдин” редакциядин коллективди алимдиз докторвилин диссертация хуьн мубаракзава!

Низам Шабанов