19-сентябрдиз Дагъустандин Кьил Рамазан Абдулатипов республикадин муниципальный тешкилатрин цIийиз хкянавай руководителрихъ: Буйнакск шегьердин — Исламудин Нургудаевахъ, Докъузпара райондин — Абдурагьим Алискеровахъ, Леваша райондин — Шамил Дарбишевахъ, Ногъай райондин — Мухтарбий Аджековахъ галаз гуьруьшмиш хьана.
Гуьруьш Р.Абдулатипова муниципалитетрин кьилерив удостоверенияр вахкунин хуш декьикьайрилай башламиш хьана.
Рамазан Абдулатипова муниципалитетрин цIийиз хкянавай кьилериз законрихъ галаз кьадайвал кIвалахуниз эвер гана. Адан гафаралди, саналди тир чалишмишвилералди муниципалитетдин гражданрин акьалтIай важиблу месэлаяр гьялдайвал, депутатрихъ ва агьалийрихъ галаз сих алакъада аваз кIвалахун — им вири муниципальный тешкилатар патал виридалайни важиблу кар я. “Гражданри государстводин властдин кIвалахриз гузвай къимет чкадин самоуправленидин органрин кIвалахдилай гзаф дережада аслу я”, — инанмишвал къалурна республикадин руководителди…
…Дагъустандин Кьилин гафаралди, Докъузпара район гекъигайла къулай гьалар авайбурун жергедик акатзава. “Им гъвечIи ва мягькем гьалар авай район я. Вирибурухъ хьиз, адахъни вичин къенепатан гьялна кIанзавай месэлаярни ава. РД-дин Кьилин ва Гьукуматдин Администрациядин Руководителдин Сад лагьай заместитель Владимир Деревянкоди ва республикадин экономикадин ва территорияр вилик тухунин министр Раюдин Юсуфова Докъузпара райондиз вилик акъвазнавай хци месэлаяр гьялунунин карда жезмай кьван гзаф куьмек гун лазим я”, — малумарна республикадин Кьили.
Гуьруьш кьиле фидай чIавуз Рамазан Абдулатипова агьалийрихъ галаз кIвалах тухунин барадай муниципалитетрин кьилериз тайин тир тапшуругъар гана: “Жуван райондин агьалийрив жезмай кьван гьуьрметдивди эгечIун, кьиле физвай кIвалахрал абур желб авун герек я. Инсанрихъ галаз гуьруьшмиш хьухь, абурухъ галаз кар алай месэлаяр веревирд ая, чахъ агьалийрихъ галаз алакъада аваз гьялиз тежедай месэлаяр авайди туш”…
Гуьгъуьнлай рахай муниципальный тешкилатрин кьилери вилик акъвазнавай кIвалахдин виридалайни важиблу терефар, абуру агьалийрихъ ва общественный тешкилатрихъ галаз сих алакъада аваз уьмуьрдиз кечирмишдай месэлаяр раижна.
РД-дин Кьилин ва Гьукуматдин
Администрациядин пресс-къуллугъ
