11-14-ноябрдиз Каспийскда, Али Алиеван тIварунихъ галай спорткомплексда, грэпплингдай кьиле фидай Россиядин чемпионатда 30-далай виниз регионрай тир 300-далай виниз спортсменри иштиракда. Идакай ва спортдин акъажунрин важиблувиликай, тешкиллувилиз талукь месэлайрикай алатай гьафтеда меркезда, “Дагъустан” РИА-дин конференц-залда, кьиле фейи пресс-конференциядал РД-дин грэпплингдин федерациядин вице-президентри — Ибрагьим Гагаева ва Мамед Къурбанова, Дагъустандин хкянавай командадин чIехи тренер Шамил Мегьамедова суьгьбетна.
Абурун гафаралди, Россиядин чемпионатда грэпплингдин кьве жуьредайни (No Gi ва Gi, яни кимоно алаз ва кимоно алачиз) гьам итимри гьамни дишегьлийри чпин устадвал къалурда. Дагъустанвийрикай чIехи пай кимоно алачир жуьредал машгъул я. И жуьредал машгъул дишегьлияр чи республикада гьелелиг авач. Амма Россиядин центральный регионра яшамиш жезвай чи ватанэгьлийрин арада абурун кьадарни, жезвай агалкьунарни писбур туш.
Мадни малум хьайивал, Дагъустандиз багьа мугьманарни гзаф къведа. Абурун арада грэпплингдай Вирироссиядин федерациядин кьиле авай ксар, машгьур спортсменарни ава.
Мугьманри чи республикада Россиядин чемпионат кьиле тухунин инициатива хуьнай РД-дин физический культурадин ва спортдин рекьяй министр С.Сажидоваз, Россиядин грэпплингдай федерациядин векилриз сагърай лагьана. Мадни абуру республикадин агьалийриз чемпионатдин бягьсериз тамашиз (пулсузди я) атун теклифна.
Рагнеда Рамалданова
