Немсерин са десте алимриз COVID-19 лабораторияда туькIуьрнава лагьай делилар жагъанва. Британиядин медицинадин “Lancet” журналдин комиссияни гьа ихьтин нетижадал атанва. Дуьньядин 30 уьлкведа пентагондин гуьзчивилик квай военный 336 биолаборатория ава. Пешекарри малумарнавайвал, и лабораторийрихъ ковид хьтин вирус арадал гъидай мумкинвал ава.
Госдумадин Председатель В.Володина вичин телеграм-каналда США-ди дуьньядин жуьреба-жуьре пипIера кардик кутунвай чпин биолабораторияр агалун герек тирдакай кхьена. Ада вичин 625 агъзурдалай виниз иштиракчияр авай телеграм-каналда инсанрин фикир чирун патал “куьне гьикI фикирзава, COVID-19 искусственный саягъда арадал гъанвани?” суал ганвай. Фикир чирун патал тухвай серенжемдин (опрос) иштиракчийрикай 95 процентди “эхь” лагьана.
Эхиримжи делилри къалурзавайвал, коронавирус себеб яз, дуьньяда ругуд миллионни зуралай виниз инсанар кьенва.
“ООН-ди коронавирус пайда хьунихъ галаз Вашингтондин алакъалувал чирунин гьакъиндай аслу тушир ахтармишунар кьиле тухун герек я. ТIугъвалдин судурди гайи зиянар-харжияр США-ди вири уьлквейриз эвез хъувун лазим я”, — кхьенва В.Володина.
Тажуб жедай делил ам я хьи, Россияди Донбасс хуьнин макьсаддалди Украинада военный махсус серенжем кьиле тухузвай алай вахтунда, Иранди гуя чи уьлкведив дронар-яракьар агакьарзава лугьуз, США-ди Ирандиз неинки санкцийрин, гьакI маса жуьредин жазаярни гун хиве кьунва. Россиядиз акси серенжемрик экечI тийизвай уьлквейризни гьелягьар кьазва. Ихьтин дуьшуьшар “международный ихтиярар чIурзавайбур” яз гьисабзава. Гьа са вахтунда США-дини РагъакIидай пата Украинадиз вагонралди яракьар тухун, пулунин жигьетдай куьмекар гун давамарзава. Миллионралди инсанар къирмишдай биояракьар арадал гъун, уьлквейрин арада чуьруькар, ягъ-ягъунар тун “международный ихтиярар чIурзавачир” гьерекатар я жал?!
Пешекарри успатнавай делилри ахьтин фикирдал гъизва хьи, Америкадин макьсад, ярж инсаниятдиз мидявалун я. Теселли гузвай са кар ава: писвал садрани хъсанвилел гъалиб жедач.
Гьа са вахтунда Украинадин гьаларихъ галаз алакъалу яз миллетбазри информациядин рекьяй тухузвай женгни эвеландалай къуватсуз хьанвайди хьиз аквазва. Интернет-майданра тапан малуматралди акьалтIай миллетбазвал, инсафсузвал, нифретвал раижзавайбурун чIалахъ жезвайбурун кьадар югъ-къандавай тIимил хьун герек я.
К.Ферзалиев
