Алатай вацра Санкт-Петербургда ММА-дал рикI алайбурун арада Виридуьньядин какахьай единоборствойрин ассоциациядин (WMMAA) къаюмвилик кваз кьиле тухвай дуьньядин чемпионатда 61 кг-дин заланвал авайбурун арада вичин ери-бине Белиждай тир Феликс Магьамедова (шикилда: чапла патахъ галайди) чемпионвилин тIвар къазанмишна.
Чи ватанэгьлидихъ агалкьунар идалай виликни хьана. Кьилди къачуртIа, винидихъ тIвар кьунвай тешкилатди 16-18 йисара авай жегьилрин арада ММА-дай кьиле тухвай кIвенкIвечивал патал акъажунра (57 кг-дал къведалди заланвал авайбурун арада) ада 1-чка кьунай. И агалкьунай ам РФ-дин спортдин мастервилин тIварцIиз лайихлу хьана. Алай вахтунда Ф.Магьамедов Каспийск шегьерда яшамиш жезва, ада “Аркада” спортзалда тренер Шамил Амирован гъилик вичин устадвал хкажзава.
Рагнеда Рамалданова
