Тарихдин памятникар цIийи хъувун патал Дагъустанда къванер гьялдай тежрибадин махсус центр кардик акатун мумкин я. Идан гьакъиндай республикадин жегьилар кардал машгъулардай “Успех” центрадин пресс-къуллугъди 27-августдиз журналистриз малумарна.
“Дагъустанда памятникар гуьнгуьна хтунин рекьяй ихтиярар ганвай “WorIdSkiIIs” центр кардик кутадай фикир ава. Дуьньяда, гьа жергедай яз Дагъустандани, вахт-вахтунда цIийи хъувунин гереквал авай тарихдин ва архитектурадин памятникар гзаф кьадарда ава. Чи республикадин мулкара чиликай жуьреба-жуьре еридин къванер хкудзава, гьа жергедай яз — киреждинбурни. Памятникар гуьнгуьна хтунин кар гъиле кьуна кIанда”, — кхьизва чешмеди.
Пресс-къуллугъдин делилралди, проектдин асул метлеб цIийиз арадал гъидай центр, Дагъустандин, гьакI маса регионрин агьалийривайни и рекьяй чирвилер къачуз жедайвал, къван гьялунин карда герек жедай алай аямдин тадаракралди таъминаруникай ибарат я.
“Центрадин куьмекдалди чавай памятникрин кими паяр бинедилай аваз хьайи гьалдиз хкиз жеда. И кар бес кьадарда багьади, харжияр акъатдайди я, амма фад ва я геж чна а кардал кIукI гъида. Центрада чна гележегда и тадаракрал кIвалахдай ва ерилу материал арадал гъидай пешекарар гьазурда, чирвал гуда”, — раижзава пресс-къуллугъди “Успех” центрадин директор Шамил Мегьамедован гафар.
“WorIdSkiIIs InternationaI” — им виридуьньяда рабочий пешеяр машгьурунин, гьа рекьяй гьазурвилер ва дережаяр хкажунин макьсад авай международный тешкилат я. “WorIdSkiIIs-дик” Россия 2012-йисуз экечIна.
«Лезги газет»
