16-октябрдиз Дагъустан Республикадин Кьил Сергей Меликова къенин йикъан кар алай месэлайриз талукь совещание кьиле тухвана. Анал школаяр бинедилай ремонт авунин, намуссузвилелди эцигунардайбурун гьерекатрикай зиян хьайи инсанриз куьмек гунин, Дагъустанда проектар информациядин къурулушдин бинедаллаз идара авунин къайда кардик кутунин, план-графикдив кьадайвал бюджетдин такьатар ишлемишунин месэлаяр веревирдна.
Гъилевай йисуз региондин 36 муниципальный тешкилатдин 139 школа бинедилай ремонтна. УстIарри ихьтин кIвалахар тамамарзава: хандакIар, къавар, дараматрин чинар, полар, дакIарар, ракIарар, гурарар, чими ийидай, вентиляциядин къурулушар, цин, канализациядин, электроэнергиядин линияр ремонт авун.
Дагъустандин образованидин ва илимдин министерстводи хабар гайивал, 1-сентябрдалди образованидин вири идарайра ремонт авунин кар алай кIвалахар акьалтIарна ва 139 школадани коллективар кIвалахдив, аялар тарсарив эгечIна.
Гьа са вахтунда дараматар ремонтдайла виле акьур са бязи синихар къени арадай акъуднавач. Бязи школаяр актуналди кьабулнавач. Сергей Меликова зулун каникулар жедалди пландик квай вири школайра ремонтдин кIвалахар куьтягьна кIанзавайди рикIел хкана.
РД-дин эцигунрин, архитектурадин ва ЖКХ-дин министр Артур Сулейманова малумарайвал, алай йисуз сад тир реестрдай кьуд кIвал акъуднава. Абур и адресра авай кIвалер я: Гьажи Булачан 8-Д, Гагаринан 17-А, А.Султанан 3-А (Махачкъала), Кавказский 4, корпус А (Каспийск).
Намуссузвилелди эцигунардайбурун гьерекатар себеб яз кIеве гьатнавай, зиян хкатнавай инсанрин ихтиярар чкадал хкун патал министерстводи 2024-йис патал план график гьазурнава. Вири терефрихъай гьазур хьайила, ам РД-дин Гьукуматдиз рекье твада.
Идалайни гъейри, кьакьан мертебайрин кIвалер эцигдайла чпин пулар кутунвай инсанриз яшайишдин рекьяй куьмек гун патал эцигунрин министерстводи талукь тир закондин проект туькIуьрнава.
Республикадин регьберди проектдин винел кIвалах хъувун, кIвалер эцигуник чпин такьатрин пай кутунвай инсанрин ихтиярар чкадал хкидай механизм тайинарун тапшурмишна. Муниципалитетрин кьилериз эцигзавай объектар чпин гуьзчивилик кутунин теклиф гана.
Артур Сулейманова эцигунрин хиле проектар информациядин къурулушдин бинедаллаз идара авунин кIвалах гьикI кардик кутазватIа, гьадакайни лагьана. Алай вахтунда эцигунрин министерстводи и жигьетдай тухванвай кIвалах себеб яз Россиядин эцигунрин министерстводин малуматдалди, вири субъектрин арада Дагъустан пуд лагьай чкадал ала.
«Информациядин хилез коррупциядиз рехъ гузвай вири идараяр, карханаяр желб авуна кIанда. Информациядин технологийри чаз коррупциядихъ галаз, эцигунрин базарда са гьихьтин ятIани проектар кьилиз акъуддайла, чпихъ такьат, къуват авачир карханаяр майдандиз акъатунихъ галаз женг чIугвадай мумкинвал гуда», — лагьана региондин Кьили.
Хийир Эмиров
