Сергей Меликова Федеральный «Кавказ» шегьреда цIийи хъувунвай рекьер ачухунин мярекатда иштиракна. Ана гьакIни видеоконференциядин алакъадин режимда аваз Россиядин Президент Владимир Путинани иштиракна.
И шегьре международный транспортдин «Север-Юг» коридордин са пай я. Дагъустанда адан яргъивилел 274 километр ала. Шегьре Чечен Республикадилай Россиядинни Азербайжандин арада авай сергьятдал кьван физва. И шегьре Кеферпатан Кавказдин федеральный округдик акатзавай регионрин транспортдин такьатар Закавказьедин уьлквейриз тухудай кар алайди я. Суткада и шегьредай 35 агъзур автомашин физва. Рехъ цIийи хъувуналди, адан хатасузвални мягькемарна, гьерекатзавай автомашинрин кьадарни артухарна. «Кавказ» шегьреди Владикавказ Грозныйдихъ, Махачкъаладихъ галаз алакъалу ийизва ва Азербайжан Республикадин сергьятдал кьван физва.
«Чна и рехъ мадни хъсанар хъувунин кIвалах давамарда. Махачкъаладин, Хасавюртдин, Дербентдин ва маса хуьрерин къецепатай цIийи рекьер тухуналди, стратегиядин «Север-Юг» коридор еримлу авун таъминарда. И мукьвара зун Азербайжандин президентдихъ галаз рахана ва чна и важиблу объектар къайдадиз гъана куьтягьунин гьакъиндай веревирдер авуна. Чпин патай абуру хейлин кIвалах тухузва», — къейдна Владимир Путина.
Сергей Меликова Дагъустан яшайишдинни экономикадин рекьяй вилик тухунин карда куьмек гунай Владимир Путиназ сагърай лагьана.
Региондин Кьили къейд авурвал, цIийи хъувунвай шегьредихъ гила кьуд зул ава. Им регион патал пара метлеблу кар я. И шегьреди республикадин чIехи шегьерарни дагълух районар сад-садахъ галаз алакъалу ийизва. Къулай, хатасуз шегьреди туризмдин хел вилик тухунизни куьмек гуда.
— Рекьерин майишатдихъ галаз Дагъустанда къе маса хилерни вилик физва, — къейдна Сергей Меликова. — ИкI, гъилевай йисуз международный аэропортунин самолетар ацукьдай ва къарагъдай майданар цIийи хъийиз эгечIнава. Автомобилрин кьуд рекье эцигунрин кIвалахар гъиле кьунва. Идалайни гъейри, Махачкъаладин международный портунихъ фидай цIийи рехъни туькIуьрунин гьакъиндай къарар кьабулнава.
«Гьуьрметлу Владимир Владимирович! Дагъустандиз датIана фикир гунай мад сеферда Квез сагърай лугьуз кIанзава. И жигьетдай чав Россиядин Федерациядин Гьукуматдин, транспортдин, эцигунрин министерствойрин, Росавтодордин патайни куьмекар агакьзава. «Кавказ» рекьерин управленидин коллективдизни, устIарризни сагърай лугьуз кIанзава. Абуру рехъ цIийи хъувун патал еке кIвалах тухвана», — лагьана республикадин Кьили.
Чи мухбир
