Мергьяматлувилин «ЛЕКИ» фондуни бине Ахцегь райондай тир меценат Нариман Гъазалиевахъ галаз санал алай йисан 2-ноябрдиз, экуьнин сятдин 10-даз, Мегьарамдхуьре авай Медениятдин кIвале 6-7-классра кIелзавай аялрин арада хайи чIалал шиирар кхьинай малумарзавай конкурсдин иштиракчийрихъ галаз гуьруьш кьиле тухуда.

Шиир кхьин патал ихьтин темаяр теклифзава: хизан (диде-бубадикай, вах-стхадикай…), тIе­­биат (дагълар, вацIар, тамун гьайванар…), хайи чил.

Конкурсдин кьилин шартIа­рикай сад конкурсда иштиракзавай аялди шиир масадан куьмек галачиз кхьин я. 2-ноябрдиз гьар са аялди чпин шиирар Мегьарамдхуьре жедай мярекатдин сергьятра аваз кIелда ва жюридин членри гъалибчияр тайинарда.

Мад са кар: шиир конкурсда иштиракзавайда кхьенвайдан гьа­къиндай шаклувал арадал атайтIа, ахьтин дуьшуьшда аялди чкадал жюридин членри тайи­нардай вахтунда шиир кхьена кIан жеда.

Конкурсда 1-чка кьурдаз – 20, 2-чкадиз – 15 ва 3-чкадиз 10 агъзур манатдин кьадарда аваз пулдин пишкешар гуда. ГьакIни тамашачийри (мярекатда иштиракдай ксари) хкягъуналди, гъалибчийрилай гъейри, конкурсда иштиракай мад 20 аялдал 1000 манатдин кьадарда авай пулдин пишкешар агакьарда. Мадни, конкурсда иштиракай гьар са кас грамотадизни лайихлу жеда. КIвенкIвечи пуд чка кьурбурун шиирар «Лезги газетда» чапда.

Конкурсда хайи чIалал кIе­лиз­, кхьиз чизвай, чпихъ шиирар кхьинин рекьяй алакьунар авай, яшамиш жезвай чкадилай тафаватлу тушиз (Дагъустандилай къе­цепата авай ватанэгьлийрин аялрихъни иштиракдай мумкинвал ава) 6-7-классра кIел­завай гьар са аялдивай иштиракиз жеда.

Конкурсда иштиракдай къаст авай гьар са аялди телефондин и нумрадиз 8-967-777-73-20 зенг авун герек я. Суалар пайда хьайитIани гьа и нумрадиз зенг ийиз жеда.

Чи мухбир