Дербент райондин администрациядин кьилиз цIийи кас — Мавсум Рагьимов атана са акьван вахт туш, амма ада чкадин гьукумдин къуллугъчияр, пешекарар ва зегьметчияр галаз райондин кар алай хел — хуьруьн майишат­  мадни вилик тухудай серенжемар кьабулзава, менфятлу рекьер ва хъсан фикирар кьилиз акъудиз куьмек гудай инвесторар жагъурзава.

Район салан майваяр, ципицIар гьа­силунай республикада кIвенкIве­чи чкадал ала. Гила емишрин бегье­рарни артухардайвал я. И кар патал райондин Рукел хуьруьн патав инвестицийрин зурба проект гъиле кьунва. 150 гек­тар­да емишрин, субтропикрин няметрин ва бахчадин майваяр битмишарда.­

— Чка пара къулайди я,- лугьузва райондин хуьруьн майишатдин управленидин начальник Юсиф Герейханова.- Кеферпатан гарарикай са шумуд тепеди хуьзва. Инвесторни гьа и хуьруьнви, гъавурда авай пешекар Тигран Абдулгьамидов я. Багъ арадал гъун, хъсан бегьерар къачун патал  алай аямдин технологияр ишлемишзава. Виридалайни герек бинелу кIвалахарни тамамарнава. Самур-Дербент къаналдилай вад километрдиз турба чIу­гунва, багълариз стIал-стIал яд гудай къайдадикай менфят къачуда. Саки кьуд километрдиз электричестводин линия тухванва, са шумуд чкадал подстанцияр эцигнава.

Багъдин чIехи пай хутун, хурмадин, пIинидин ва алучадин тарари кьунва. Ина гьакI бадамар, анарарни битмишарда. 65 гектарда къелемар кутунва. Алай вахтунда багъманчийри мад 15 гектарда къелемар цазва. Гьа са вахтунда 15 гектарда “Азия” сортунин некьийрин штиларни акIурзава. И сорт квелди хъсан я лагьайтIа, некьийрин дадни тIямлуди я, инай-аниз тухудайлани, чIур жезвач. Мукьвал вахтара йисан вири вахтунда некьияр битмишарун патал теплицаярни эцигда.

Инвесторди 15 гектарда гатун халияр, къарпузарни цадайвал я. Абурухъ гьам республикада, гьам Россиядин регионрани пара игьтияж ава. Хам чкада абур фарашдиз экъечIни ийида. Гьелелиг инвесторди анжах пулдин вичин такьатар  харжзава. Крар вилик екебур ква.

— Багълари ва салари Рукел, къунши хуьрерин хейлин агьалияр кIвалах-далди ва хъсан мажибралди таъминарда. Республикадин, чкадин бюджетриз налогарни гуда. Гъиле кьунвай крар вири кьилиз акъудун патал государстводин патайни куьмек  герек я,- лугьузва “Рукел” ООО-дин регьбер Къазимегьамед Мегьамедова.

Са рахунни алач, гьукумдин идараяр кьулухъ акъваздач. Багълар, ци-пицIлухар арадал гъизвайбуруз талукь махсус программайрин бинедаллаз инвесторрив эвездин пуларни ахгакьда.

* * *

Мадни къейд ийиз кIанзава хьи, эхиримжи йисара талукь идарадин къуллугъчийри Ростов-Баку федеральный шегьре рекьин къерехар да­тIана зирзибилдикай михьзава. ЯтIани чарар, пакетар, эцигунрин амукьаяр гадарзавай дуьшуьшарни давам жезва. И йикъара Дербент райондин администрациядин кьил Мавсум Ра­гьимова  Жалгъан, Хазар, Араблинка,  Агъ­­лаб, Рубас хуьрерин патаривай физвай рекьин къерехар авай гьал ахтармишна.

Санлай къачурла, хуьрерин администрацийри чпин мулкарал ва рекьин къерехра михьивал хуьн таъминарзава. Куьлуь-шуьлуьйрин патахъай хуьрерин администрацийрин кьилериз тапшуругъар гана.

Хийир Эмиров