Кьасумхуьруьн 2-нумрадин мектебдин дарамат эцигуниз талукь тир мулкара сергьятар тайинарунин кlвалахар кьиле фейи вахтунда малум хьайивал, Алидхуьруьн сергьятра 10 йис идалай вилик къанунсуздаказ, яни ихтиярар гузвай документар авачиз эцигнавай коммерциядин объектар дуьздал акъудна. Идакай «Лезги газетдиз» райадминистрациядин пресс-къуллугъди хабар гузва.
Идалай вилик райондин кьил Нариман Абдулмуталибова ихтиярар авачиз мектебдин сергьятрай чилер кьунвайбуруз абур азад авунин буйругъ ганай. Идалайни гъейри, къанунсуздаказ кьунвай чкаяр абур кьунвай вахтунилай аслу тушиз, азад хъийидайдакай тагькимарнай.
Мектебдин сергьятра эцигнавай туьквендин иеси райадминистрацияди ам чукlурун патал авур теклифдал рази хьана. Гъавурда акьунай райондин кьили адаз сагърай лагьана. Кьвед лагьай объектдиз талукь материалар суддив вуганва ва мукьвал вахтара ам чукlурда.
«Лезги газет»
