25-октябрдиз РД-дин Халкьдин Собранидин сессиядал, месэладиз кьвед лагьай сеферда килигуналди, азарриз акси рапар ягъунин жигьетдай законопроектдик дегишвилер кухтуна. Абур азарриз акси рапар ягъуникди чIуру таъсир (осложенияр) арадал атунин нетижада пулар гуниз талукьбур я.
РикIел хкин: Дагъустанда, азарриз акси рапар ягъуникай чка-чкада отказун себеб яз, садакай масадак акатдай азарри кьил хкажнава. ИкI, ярарихъ галаз алакъалу гьалар хъсанбур туш. Алай йисуз садакай масадак акатдай и хаталу уьзуьрдикди 218 кас азарлу хьана. Гекъигун патал: шаз-анжах 99 дуьшуьш. Азарлуйрин кьадар гзаф хьун азарриз акси рапарикай отказунихъ галаз алакъалу я.
Къейд авун лазим я хьи, гзафни-гзаф ярар 5 йисал къведалди яшара авай аялрик акатзава, вични -гьавадай. Ам неинки бедендал еке ифин акьалтуналди, гьакIни чIуру таъсир (осложнение) себеб яз, пневмония, менингит хьтин азарри кIеве туналдини хаталу я. Ихьтин дуьшуьшра азарлуди яргъалди сагъарун лазим къвезва. Медикри рикIел хкизва: азарриз акси рапар ягъуникай кьил къакъудзавайбуру чпин сагъламвал, уьмуьр еке хаталувилик кутазва!
Республикада ярар акатуникди азарлу хьайи ксарин кьадар артух хьуникди са жерге серенжемар кардик кутунва, гьа гьисабдай яз-рапар ягъ тавунвай аялар чирвилер гудай идарайриз вахтуналди кьабул тавунинни. Азарриз акси рапар янавачир ксар больницайра чпин сагъламвал пландин бинедаллаз мягькемарун патални кьабулзавачир.
Республикада кьилдин ксаринбур тир аялрин бахчайри гьалариз кьецI гузва, гьикI хьи, анра азарриз акси рапар ягъ тавунвай аяларни кьабулзава. Аялар кьабулдайла, медкарточка тIалабзавач.
«Лезги газет»
