26-июндиз Дагъустан Республикадин­  Гьукуматдин Председатель Абдулмус­лим Абдулмуслимован регьбервилик кваз кьиле фейи Оперативный штабдин заседанидал регионда туризмдин сезон кьиле физвай гьал веревирд авуна. Идан гьакъиндай редакциядиз РД-дин Гьукуматдин пресс-къуллугъди хабар гана.

Мярекат ачухдайла региондин премь­ер-министрди жавабдар ксарин фикир Чиркейдин цин гьамбарханадин майдан­ра луьтквейра, гъвечIи гимийра аваз теш­килзавай сейрар къанун-къайдадал амална кьиле тухунал,  инсанри ял язавай пляжрин къерехар михьидаказ хуьнал, туристар физвай чкайра къулай шартIар тешкилунал желбна.

Дагъустанда туризмдин хиле авай гьаларикай РД-дин туризмдин ва халкьдин художественный сеняткарвилерин рекьяй министрдин сад лагьай заместитель Абдула Мегьамедова гегьенш док­лад авуна.

Сифте нубатда ада къейд авурвал, туризмдин мулкара михьивал ва  санитариядиз талукь гьалар хуьн патал муниципалитетрихъ галаз саналди тир кIвалах тухун давамарзава. Идахъ галаз сад хьиз, гзаф кьадар туристар физвай рекьер, чкаяр къайдада твазва, анра хатасузвал таъминарзава.

Вичин рахунра Абдула Мегьамедова республикадин са бязи муниципали­тетра гзаф кьадар туристар физвай 8 чкада санитариядин рекьяй герек тир ­серенжемар кьабулнавач лагьана чу­кIу­рай тапан малуматдиз талукь яз баянар гана.

«Социальный сетриз акъатай санитариядин точкаяр (санитарные точки) авачир 8 чкадиз талукь малуматдин гьакъиндай лугьуз кIанзава, абур 2021-йисан эхиррай эцигнавай ва вири объектарни муниципальный тешкилат­рин балансдив вахканай.

Авайвал лагьайтIа, чIехи пай объект­ри чпин кIвалах давамарзаватIани, ара-ара туристар къвезвай бязи чкайра санитариядин истемишунрал амал тийизвайдан гьакъиндай арзаяр ийизва. Гьавиляй муниципалитетрин  туризмдин хилехъ галаз алакъалу пешекарривай и месэладиз кьетIен фикир гун тIалабзава. Чкайрал туристри ял язавай гьалдал информациядин центрайрини гуьзчивал авун хъсан кар я, — лагьана ада.

«Гьа са вахтунда лугьун лазим я хьи, исятда республикада гьуьле, вацIара, ви­рера чуьхуьнагар ийидай вахт я. Вири чкайра ял язавайбурун хатасузвал ва михьивал хуьдай шартIар тешкилна­ва лугьуз жедач. Къейд ийиз кIанзава хьи, министерстводи муниципалитетрин­ ва чпин балансдал пляждин мулкар алай бизнесдин векиларни кутунвай махсус­ десте тешкилнава. Министерст­води адаз консультациядин, тешкиллу­вилин рекьяй куьмекар гузва, Роспот­ребнадзордин ва РД-дин гъвечIи гимий­рин рекьяй государстводин инспекция­дин векиларни галаз туристрин хата­суз­вал хуьнин рекьяй семинарар тухузва­.

Гьа икI, саналди тухузвай кIвалахдин нетижада, 2008-йисалай сифте яз Рос­потребнадзордин патай Дербент шегьердин «Бриз» пляж патал разивилин икьрар къачудай мумкинвал хьана. Мадни 10 пляж, закондин истемишунрив кьадайвал, РД-дин гъвечIи гимийрин рекьяй государстводин инспекциядин учетда эцигнава. И хиляй кIвалах чна мадни давамарзава», — алава хъувуна А.Мегьамедова.

Лагьана кIанда, социальный сетриз пляждин мулкарин иесийри туристривай къанунсуздаказ пулар къачузвайдакайни малуматар акъатнавай. Идан гьакъиндай А.Мегьамедова баянар гана. Адан гафарай малум хьайивал, РФ-дин Цин кодексда тестикьарнавайвал, гьуьлерин, вирерин, вацIарин къерехар гьар са агьалидиз пулсуздаказ ишлемишдай ихтияр ава. Гьавиляй цихъ галаз алакъалу мулкара ял язавайбурувай, чуьхуьнагарзавайбурувай пулар къачун къанундиз акси кар я.

«Ихьтин крарин вилик пад кьун патал за муниципалитетрин векилривай къайдаяр хуьдай органрин къуллугъчийрихъ галаз санал ял язавайбурувай цин объектрал законсуз пулар къачузвай дуьшуьшар винел акъудун ва герек серенжемар кьабулун тIалабзава», — къейдна А.Мегьамедова.

Мярекатдин эхирдай Абдулмуслим Абдулмуслимова РД-дин туризмдин ва халкьдин художественный сеняткарвилерин министерстводал муниципалитет­рин администрацийрихъ галаз санал туризмдин вири объектрал къанунди истемишзавай жуьредин санитариядин гьалар таъминарун патал герек серенжемар кьабулун тапшурмишна.

Хийир  Эмиров