И йикъара Дагъустандин халкьдин шаир, СССР-дин писателрин Союздин член, критик, публицист, цIудралди ктабрин автор, Дагъустандин государстводин, Етим Эминан, СтIал Сулейманан тIварарихъ галай премийрин лауреат, хейлин йисара лезги чIалал акъатзавай аялрин «Кард» журналдин редактор яз кIвалахай Ханбиче Шихрагьимовна Хаметовадин 85 йис тамам жезва.
Ханбиче Хаметова Дагъларин уьлкведин милли эдебиятдин мягькем дестекрикай сад я. И кардин гьакъиндай адан къелемдикай хкатнавай эсерри – шиирри, поэмайри, драмайри… — шагьидвалзава. Абурукай хейлинбур жуьреба-жуьре чIалариз таржумани авунва.
Алай вахтунда пенсиядиз экъечIна ял язаватIани, чIалан устад вичин асул пешедивай – шаирдин рекьивай – къерех хьанач. Алай девирдин крарикай, жемиятдин уьмуьрда кьиле физвай муракаб гьерекатрикай, вакъиайрикай вичин фикирар ширин цIараралди лугьузва. Чи мурад Ханбиче Шихрагьимовнадихъ чандин сагъвал, яргъи уьмуьр, акьалтI тежер илгьам хьун я.
«Лезги газет»
