Квез чидани?
ТипIер йифен ажайиб къушар я. Абурулай ван-сес тавуна лув гуз, садлагьана кичI кутудай саягъда гьарайиз алакьзава. ТипIер гуьзет тавур чкайра пайда хьунни мумкин я. Адет яз, абуру кьифер кьада.
Амма типIрехъ галаз алакъалу виридалайни итижлу делил ам я хьи, и къуш камаллувилин ярж яз гьисабзава. Алимрин фикирдалди, типIер камаллу къушар яз гьисабунин себебрикай сад абуру йифен береда сирлудаказ гьараюнихъ галаз алакъалу я. Къуватдиз, деринвилиз ва надирвилиз килигна, типIери акъудзавай хьтин сесериз барабарбур мад авач. Абурувай ван ацалтна хъуьрезни жезва. ТипIрен гьарайди неинки инсанриз, гьакI гьайванризни къариба тегьерда эсер ийида.
Биологрин фикирдалди, типIрен кьетIен камаллувал, маса къушарив гекъигайла, адан мефтI артух хьунихъ галаз алакъалу я. И къушариз са куьлуь вишришдин ванни жеда, йифен вахтунда яргъал мензилдай вичин гъуьрчни аквада. ТIиб гзаф сабурлу, тIурутIум акат тийидай, кьетIен жуьреда фикир-фагьум авуна, ахпа гъуьрч ийидай къуш я.
Аламатдин мад са делил. ТипIрен кьил фикиррик акатнавай инсандин чинизни кьилиз ухшар я. Ам камаллувилин къуш яз гьисабунин себебрикай сад гьа и делил хьунни мумкин яз гьисабзава.
Грециядин къадим агьалийри, эгер дуьшуьшдай тIиб гьалтайтIа, виридалайни четин са месэла гьялиз хьунин фикир кьилиз къведайди яз гьисабзавай. И къушарихъ галаз алакъалу гзаф кьадарда риваятар, итижлу делилар дуьньядин халкьарин арада чкIанва.
«Лезги газет»
