Эхиримжи вахтара кьадардиз тIимил миллетрин чIалар квахь тавунин патахъай гзаф рахунар кьиле физва. Гьа жергедик акатзавай лезги чIал хуьнин мураддалди чи районра, хуьрера хейлин мярекатар тешкилзава. И жигьетдай Сулейман-Стальский районда кьабулзавай серенжемар тариф авуниз, чешне къачуниз лайихлу я.
Мегьарамдхуьруьн райондин Бут-Къазмайрин хуьруьн юкьван мектебдани лезги чIал хуьниз, ам саламатдиз гележегдин несилрал агакьаруниз кьетIен фикир гузва, жуьреба-жуьре мярекатар тухузва. Абурун арада Урусатдин лайихлу артист Абдулкъадир Сайдумован, машгьур гьикаятчи Абдулбари Магьмудован 90 йисан юбилейриз, “Дидедин йикъаз” ва лишанлу маса вакъиайриз талукьарнавай мярекатар ава.
Къейдна кIанда, межлисрин сергьятра аваз аялри хайи чIалал фасагьатдиз шиирар кIелна, чIехи устадвилелди сегьнейрин ролар тамамарна. Абур гьазурунин карда аялриз тарсар гузвай муаллимри чIугур зегьметни тарифдиз лайихлу я.
Дидед чIал хуьнин макьсаддалди тешкилзавай гьар са мярекатдихъ, кьабулзавай гьар са серенжемдихъ еке метлеб ава. И кIвалах лезги хуьрерин вири мектебра вилик тухвана кIанда.
Тамила Салманова
