Ö     Дерин манадин, метлеб лап куьрелди лугьузвай гафар гьам абурун автор, гьамни кIелзавайди патал — акьул-камалдин, спорт лагьайтIа, бедендин ва мускулрин гимнастика я.

Ö     Камаллу гафарин манадин гъавурда вири акьадач, анжах еке акьул, бажарагъ авай ксари абурун деринвални  успагьивал кьатIунда.

Ö     Дерин манадин гафар уьмуьрдин, яшайишдин асул камал я. Абур булвилелди авай ктабри инсанар чпихъди ялда, желбда. Ктабар кIелдайла, гьахьтин гафар ва ибараяр жагъуриз алахъна­ кIанда.

Ö     Камаллу гафуник далдаламиш хьанвай дерин мана ква.

Ö     Камаллу гаф дувулар деринриз фенвай гуьзел цуьк хьиз я.

Ö     Ахьтин камаллу гафар жеда хьи, абуру муракаб крарин, вакъиайрин асул гьакъикъатни тажубардай хьтин кутугайвилелди ачухарда.

Ö     Камалдин гафуни я са цIийивал ачухарда, я малум тир кардиз, гьакъикъатдиз нур-экв яда.

Ö     Камалдин гафар кIелуналди ахмакь акьуллу жедач, амма акьуллуди дериндай фикируниз мажбурда.

Ö     Руьгьдай регьимлуди, тамамди, хъсан къилихринди хьун патал гьар юкъуз са манидихъ хьайитIани яб акална кIанда; я тахьайтIа, са хъсан шикилдиз (картинадиз) килигин, я са камаллу ибара кIелин.

Ö     Сефил, пашман макъамда кIвалаха, зегьмет чIугу. Гъам-ха­жалат алудун, чукурун патал гьам виридалайни хъсан та­кьат я.

Ö     Япарилай гзаф вилерихъ ихтибарна кIанда.

Ö     Ахмакьдаз меслят къалурун буьркьуьдав гуьзгуь вугай мисал я.

Ö     Ксуз кIанзавайла, алатнавай юкъуз вуна авур крар, кIва­лахар, гьерекатар сад-садахъ авуна, секин тахьанмаз, вилер акьалмир.

Ö     Жуван гъилик квай ксар критика ая, амма — гьахълудаказ. Гьа са вахтунда идалай гуьгъуьниз абуру квел фикир желб авун лазим ятIа, гьадакайни лугьуз рикIелай алудмир.

Ö     Ваз гьуьрмет авуна кIанзаватIа, жувани гьуьрмет  ая, гьар садахъ галаз мецелди, эдеблудаказ рахух.

Ö     Намус-гъейрат, эдеб-гьая насигьатрин виридалайни хъсан ктаб я. Адаз мукьвал-мукьвал вил ягъа.

Ö     Алчах гьарамзададин намус ахварикай кудун патал адан хъуьхъвехъ сад галукьарна кIанда.

Ö     Юмор зурба къуват я. Хъсан, зарарсуз хъуьруьни хьиз, мад са куьнини инсанар сад-садаз мукьва ийидач.

Ö     Бедендин гьерекатрикай виридалайни дуьзди, сагъламди хъуьруьн я: ада тIуьрди иливариз, цIуруриз, дамарра иви къе­къуьниз куьмекзава, вири органра уьмуьрдин такьат — къуват кIубанарзава.

Ö     Ягьанат квай хъуьруьни инсан кьурурдач, анжах адак квай «эчIелин хъач» куда.

Ö     Эгер инсанди вичин алакьунрилай, мумкинвилерилай виниз тир къуллугъ кьунватIа, адан кимивилер дуьздал акъатда, агъуз тир къуллугъдал алатIа, — лайихлувилер.

Ö     Вирида тухарда, са властдилай  гъейри, властдихъ авай къарихвал рекьиз жедач.

Ö     Властдихъ кьадарсуз ялун инсан тамамди, бегьемди туширвилин лишан я.

Ö     Девлет гьуьлуьн яд хьиз я — хъурдавай къарихвал артух жеда.

Ö     Чи вири уьмуьр — ката-калтугун гьамиша гзаф инсанар квай вокзал, инсанар чеб лагьайтIа, къвез хъфидай поездар я.

Ö     Эгер минзерайра (горизонт) милли игит пайда жезвач­тIа, я ам фикирра арадал гъида, я архиврай майдандиз ахкъудда­.

КIватIайди — Ш.Шихмурадов