Духтурдин патав яшариз акъатнавай са итим къведа ва вичин гьалдикай лугьуда:

- Гьуьрметлу доктор, зи кIва­чер шанкIал хьайибур хьиз ава, кIарабар тIазва. Ацукьайла, ярх хьайила, къарагъиз кIамукь­за­вач. Яраб квевай ятIа, уьзуьр вуч ятIа?

- ГьикI квевай? Гьелбетда, - кьуьзуьвиливай я, - жаваб гуда духтурди.

- Тьфу! Ваз маса гаф чидайди тушни? - вичин наразивал къа­лурна кьуьзуьвиликай ван хьана такIанзавай агъсакъалди.

* * *

Са кьадар йисар алатайла, учительницадал куьчеда вичин виликан ученик Расул гьалтда.

- Я Расул, вун гьикI я? Алай вахтунда квел машгъул я? - жузада учительницади.

- Хъсанзава. Исятда зун метеролог я, - жаваб гуда гадади.

- Ай-яй-яй, мектебда кIел­дайла, вун гьикьван хъсанди тир! Табдай хесет квайди тушир. Гила килиг - метеоролог! - туьгьметна муаллимди.

* * *

- Петрович, ша чун зи дачадиз фин, ана шахматрални къугъван, са пивоярни хъван, - теклифна Иваныча  вичин дустуниз шегьердин паркара сейр авурдалай кьулухъ.

- Вучиз къведач кьван? - жаваб гуда Иваныча.

- КъведачтIа, къведач ман, - лагьана, кьил баштан хъувуна Петровича, ам элясна, вичин кIвал галайвал хъфена.

* * *

- Яда, за къе экуьнахъ кроссворд ацIурзавай. Са клеткада кхьенва: “Вичин вири мажиб  масадав вахкуниз мажбури кас, адан эвезда адав анжах тIуьн я агакьзавайди. Пуд гьарфуникай ибарат я а гаф”. Ам вуж хьуй? - хабар кьада Михаила Сидоравай.

- ЛукI, - жаваб гуда Сидора.

- Зани гьакI фикирнавай. Амма папа масакIа лугьузва: гъуьл...

"Лезги газет"