Аллагь Таалади лагьана: “Эй, Аллагьдихъ инанмиш хьанвайбур, сабур ая ва гзаф дурумлувал къалура (яни, дяведин четинвилер эхуна душмандилай гзаф дурум гун)”. (“Алю Имран”, 200).
Аллагьди гьакIни лагьана: “Гьакъикъатда, сабурлубурал чпин пишкеш тамамвилелди, кьадар авачиз, агакьда”. (“Аз-Зумар”, 10).
“Эй, Аллагьдихъ инанмиш хьанвайбур! Куьне квез сабурдикай ва кпIуникай куьмек яхъ. Гьакъикъатда, Аллагь сабурлубурухъ гала”. (“Аль-Бакъара”, 153).
“Квекай ни женг чIугвадатIа ва ни сабур ийидатIа чирун патал чна куьн гьар гьикI хьайитIани ахтармишда”. (“Мугьаммад”, 31).
Лагьана кIанда, сабур хуьниз эвер гузвай, адан лайихлувал ачухарзавай аятар мадни ава. Агъадихъ чна газет кIелзавайбурун фикирдиз сабурдикай чи йикъарал агакьнавай бязи гьадисар теклифзава.
Абу Саид Саад бин Малик бин Синан аль-Худриди агакьарнавайвал, са сеферда ансаррикай тир са десте инсанри Аллагьдин Расулдивай (с.а.с.) са вуч ятIани тIалабна ва ада абуруз тIалабай шей гана. Гуьгъуьнлай абуру Пайгъамбардивай (с.а.с.) мад са вуч ятIани тIалабна. Гьамни гана абуруз. Пуд лагьай сефердани тIалабна. И чIавузни ваъ лагьанач Мугьаммад Пайгъамбарди (с.а.с.) ансарриз. Вичихъ авай вири шейэр пайна куьтягьайла, Аллагьдин Расулди (с.а.с.) лагьана: “Захъ авай са затIни за квехъай чуьнуьхдач. Амма рикIел хуьх, ни вичин нефс хвейитIа (яни, вичиз авайдал рази хьана, инсанривай са затIни тIалаб тийиз), Аллагьди ам агьваллувилел гъида. Вуж вичин кIвалахар хсуси къуватралди кьилиз акъудиз алахъайтIа, Аллагьди ам масабурун куьмекдихъ муьгьтеж хьуникай хуьда. Ни сабур авуртIа, Аллагьди адан кьилени сабур твада. Гьеле садазни сабурдилай хъсан ва къиметлу пишкеш гайиди туш”. (Аль-Бухари Муслим).
Лугьузвайвал, Ягьйа Сугьайб бин Синана агакьарна. Аллагьдин Расулди (с.а.с.) лагьана: “Аллагьдихъ инанмишвалдай гьал гьикьван ажайиб ятIа аку! Гьакъикъатда, ам авай гьалда адаз вири крар хушбахтбур я. Адалай гъейри, ихьтин гьал садазни ганвач. Эгер са куь ятIани ам шад авуртIа, ада Аллагьдиз шукур ийизва ва и кар ам паталди хушбахтвал жезва. Эгер адаз хажалат хьайитIа, ада сабур ийизва. Имни адаз хушбахтвал жезва лагьай чIал я”.
«Ас-салам» газетдай
