Чирвилерихъ ялдайбур, алакьунар авайбур гьеле мектебда кIелзавай йисарилай чир жеда. Бажарагълувални пешекарвал себеб яз, ахьтин ксари уьмуьрда агалкьунрин кукIушар муьтIуьгъарда, абурукай жемиятдиз, миллетдиз гьакъисагъвилелди къуллугъдай ватанпересар хкатда. И йикъара зун вичиз гьа ихьтин ерияр хас са жегьилдихъ галаз таниш хьана. Ам ФЛНКА-дин (Федеральная лезгинская национально-культурная автономия) исполкомдин председатель Гьуьсен Исамудинович Шагьпазов я.
Гьуьсен 1989-йисан 14-августдиз Кьурагь райондин Аладаш хуьре дидедиз хьана. Ана мектебда кIелзавайла, ада вич хъсан чирвилер авай чешнелу ученик яз къалурна. 9-классда авайла, ада тарихдай кьиле фейи Вирироссиядин олимпиададин республикадин паюна гъалибвал къачуна. Аладашдин мектебда 9-класс куьтягьайдалай кьулухъ Гьуьсен Шагьпазова Дербент шегьердин 3-нумрадин мектебда кIелун давамарна. 11-классда кIелзавайла, ада биологиядай Вирироссиядин олимпиададин республикадин паюна гъалибвал къачуна, гьа и йисуз адакай “Бажарагълу жегьилар” номинациядай РФ-дин президентдин грантдин сагьибни хьана. 2006-йисуз Гьуьсена Дербент шегьердин 3-нумрадин мектеб къизилдин медалдалди куьтягьна.
2013-йисуз ада Москвада Россиядин туризмдин ва сервисдин госуниверситетдин туризмдин факультет, 2015-йисуз М.В.Ломоносован тIварунихъ галай МГУ-дин тарихдин факультетдин магистратура яру дипломралди акьалтIарна.
Студент тир йисара ада Вирироссиядин жегьилрин “Селигер-2010” форумда иштиракна; университетдин кIватIалриз адан са шумуд макъала акъатна; “Студентрин илим” лишандик кваз Москвада кьиле фейи илимдинни тежрибадин конференциядин нетижайрай Гьуьсен Шагьпазоваз 1-чка кьунай диплом гана.
Дидени буба кьведни тарихдин муаллимар тирвиляй Гьуьсенани тарихдин факультет хкяна жеди. Алай вахтунда тарихдин муаллим яз кIвалахзавай адан буба Исамудин Шагьпазова хайи хуьруьн мектебда са шумуд йисуз директорвални авуна. И.Шагьпазован ери-бине Кьурагь райондин Гелхенрин хуьр я.
Гьуьсен Шагьпазова 2013-йисан сентябрдилай ФЛНКА-да сифтедай жегьилрин департаментдин руководитель яз, 2014-йисалай инихъ и тешкилатдин исполкомдин председателвиле кIвалахзава.
Жегьилди ФЛНКА-да хейлин кIвалахар кьилиз акъуднава ва и кар давамарзава. Тешкилатдин жегьилрин департаментдин кьиле акъвазнавайла, ада Москвада ва маса регионра авай Дагъустандин жегьилрихъ галаз менфятлу проектар кьилиз акъудна, жегьилриз талукь форумар, семинарар ва маса мярекатар тешкилна, тешкилатдин официальный сайт патал материалар гьазурна ва икI мад.
Исполкомдин председателвиле хкягъайдалай кьулухъ адан хиве мадни жавабдар везифаяр гьатна. Регионрин тешкилатрихъ галаз санал кIвалахунин, РагъэкъечIдай патан Кавказдин гьаларин гьакъиндай аналитикадин материалар гьазурунин, ФЛНКА-дин журналистрин дестедин, активистрин ва чпин гуьгьуьлдалди крарик къуьн кутазвайбурун кIвалахриз фикир гунин, малумарнавай проектар кьилиз акъудунин крарал гуьзчивал тухунин ва абурун гьакъиндай гьахъ-гьисабдин чарар гьазурунин жавабдар кIвалахриз Гьуьсен Шагьпазова регьбервал гузва.
Гь.Шагьпазоваз ингилис ва испан чIалар чизва. 2017-йисан июндин вацра ада гъвечIи халкьарин ихтиярар хуьнин рекьяй Брюсселда Европарламентдин депутатдин еринда тежриба кIватIна. Им, гьелбетда, ФЛНКА-дин векилди лезги халкьдин ихтиярар хуьнин карда международный дережада кьилиз акъуднавай агалкьун яз гьисабиз жеда.
ФЛНКА-дин руководстводиз алакьунар авай жегьилдикай гьеле ам студент тир вахтунда хабар хьана. И тешкилатди Гьуьсен Шагьпазоваз вузда лап хъсандиз кIелунай, лезги жегьилрин общественный уьмуьрда активнидаказ иштиракунай наградаяр гана.
ФЛНКА-диз кIвалахал атайдалай кьулухъ Гьуьсен Шагьпазова хейлин проектрик кьил кутуна ва агалкьунралди кьилизни акъудна. ИкI, Россияда ва Азербайжанда авай лезгийрин уьмуьрдикай Youtube-да “Лезги хабарар” передача, 2013-йисуз Ингушетияда, 2014-йисуз Ахцегьа, 2015-йисуз Мегьарамдхуьре жегьилрин форумар, 2013-йисуз Россиядин халкьарин садвал мягькемаруниз талукь темадай Москвада илимдинни тежрибадин конференция, 2015-йисуз Москвада “Дербент: тарихдин 2000 йис” темадай международный илимдин конференция ва маса мярекатар тешкилна.
Къуй ФЛНКА-дихъ, Гьуьсен Шагьпазовахъ мадни агалкьунар хьурай!
Куругъли Ферзалиев
