Ватандин ЧIехи дяведа Докъузпара райондай 3 агъзурдалайни гзаф ксари иштиракна. Абурукай гзафбуруз элкъвена хкведай кьисмет хьанач.
Дяведа иштиракай ветеранрин кьадарни йисалай-суз тIимил жезва. Докъузпара районда амайди анжах са ветеран я. Ам къалажухви Атамов Межид Салигьович я.
Гъалибвилин суварин вилик Докъузпара райондин кьил Абдурагьим Алискеров, Дагъустандин госзакупкайрин рекьяй комитетдин председателдин везифаяр тамамарзавай Джафар Гьажибегов, Ахцегьа авай сергьятчийрин къуллугъдин комендант Алексей Свиридов, Докъузпара райондин кьилин заместителар Салигь Гьажимурадовни Агьмед Агьмедов, райондин прокурор Мисбагь Назиров, УСЗН-дин начальник Эсед Арабов ва масабур ветерандал кьил чIугваз ва адаз Гъалибвилин сувар мубаракиз фена.
Дяведин иштиракчи Межид Салигьович Атамов “Германиядин винел гъалибвал къачунай”, “Кавказ оборона авунай” ва “Жуьрэтлувиляй” медалрин сагьиб я.
«Лезги газет»
