Советрин Армиядин жергейриз эвер гайила, Докъузпара райондин Къаракуьредай тир Гьажи Магьмудован 20 йис тир. Буйнакскдин ветеринариядинни зоотехниквилин училище акьалтIарнавай жегьилди 1940-йисан майдилай сентябрдал кьван махсус курсара женгинин чирвилер къачуна. Гуьгъуьнлай ам кьисметди гвардиядин атлуйрин 3-корпусдин 5-дивизиядин минометрин 178-полкуниз акъудна. Чешнелу аскердал полкунин командирдин заместителдин везифаяр ихтибарна. Дяведин вахтунда Гьажи Магьмудова Прибалтикадин, Белоруссиядин, Кьиблепатан фронтра къуллугъна.
Лагьана кIанда, чи баркаллу ватанэгьлиди Сталинград патал кьиле фейи женгера зурба викIегьвилер къалурна. Сталинграддин женг кьиле физвай чIавуз, 1942-1943-йисара, дяведин гьал дибдай дегиш хьана, Советрин кьушунрин гьужумри хъсан нетижаяр гузвай. Сталинград шегьер хуьник чIехи пай кутунай Гьажи Магьмудовав 1943-йисан 12-сентябрдиз гвардиядин атлуйрин 3-корпусдин командирдин заместителрикай сад тир Давид Доброшина СССР-дин Верховный Советдин Президиумдин тIварунихъай “Сталинград хуьнай” медаль вахкана.
Дяве давам жезвай. Виридан мурад сад тир: Гъалибвал мукьва авун. Гьа ихьтин къаст рикIевай Гьажи Магьмудова женгера дирибашвилер къалурун давамарзавай. 1944-1945-йисара Белоруссиядин фронт Белоруссияда, Польшада, шаркь патан Пруссияда кардик квай. Старший сержантдин чинда аваз чи ватанэгьлиди гьа и фронтдик акатзавай винидихъ тIвар кьур 5-дивизиядин гвардиядин артиллериядинни минометрин 178-полкунин гьужумра иштиракзавай. 1944-йисан октябрдин вацра дивизиядин бязи кьушунар Германиядихъ галаз авай государстводин часпардиз мукьва хьана. Ина кьиле фейи женгера Гьажи Магьмудова къуллугъзавай дивизиядин кьушунри акьалтIай викIегьвал къалурна. Кьегьалвилер абуру Германиядин чIехи шегьерар къачудайлани тикрарна. Иллаки шегьер-къеле Кенигсберг гьалкъада твадайла. И женгинин нетижада Гьажи Магьмудов “Кенигсберг къачунай” медалдиз лайихлу хьана.
1945-йисуз зирек дагъвидиз Берлиндин операциядани иштиракун кьисмет хьана. Гъалибвилин югъ лагьайтIа, ада Леба шегьердиз мукьва авай Эльба вацIал къаршиламишна.
Гьажи Магьмудова гвардиядин атлуйрин 3-корпусдин 5-дивизиядин минометрин 178-полкуник кваз Ватандин ЧIехи дяведа 1941-йисан 22-июндилай 1945-йисан 30-апрелдал кьван иштиракна. 1943-йисалай ам ВКП(б)-дин член тир.
Фашистрин Германиядин винел Гъалибвал къазанмишунин карда къалурай дирибашвиляй Гьажи Магьмудович Магьмудоваз Баркалладин III дережадин, Ватандин дяведин 1-дережадин орденар, “Сталинград хуьнай”, “Кенигсберг къачунай”, “Германиядин винел гъалиб хьунай”, “Жукован” медалар ва хейлин маса наградаяр гана.
Дяведин вахтунда Гьажи Магьмудовал хирерни хьана. Зайиф хьайи гьар сеферда рикIевай къастуни — фашистрин винел гъалибвал къазанмишуни адан руьгь цицIи хъийизвай. Ватан патал виридалайни четин йисара ада женгинин яргъал рекьер атIана. Гьажи Магьмудов хьтин гьар са кьегьал, ватанперес чи кьилин винизвал, дамах я.
1946-йисуз ам хайи хуьруьз хтана, хизан кутуна, 3 хвани 2 руш чIехи авуна. ДГУ-дин филологиядин факультет акьалтIарна, 1948-йисалай 1999-йисалди Къаракуьредин мектебда кIвалахна. ЧIехи ватанперес, несилрин насигьатчи, муаллим Гьажи Магьмудов 88 йисан яшда аваз рагьметдиз фена.
ЧIехи Гъалибвилин суварин вилик Къаракуьредин мектеб Ватандин ЧIехи дяведин ветеран Гьажи Магьмудович Магьмудован тIварунихъ ягъуниз талукьарнавай гурлу мярекат кьиле фена. Ана Докъузпара райондин кьиле авай ксари, жемиятдин векилри, ветерандин хизанри ва масабуру иштиракна. Мектеб ветерандин тIварунихъ ягъуни ЧIехи Гъалибвал къазанмишайбур несилрин рикIера эбеди яз амукьдайди мад сеферда субутзава.
Мегьамед Ибрагьимов
