Донбассдин мулкар Украинадин миллетбазрикай, фашистрикай азад авун патал кьиле тухузвай махсус серенжемда чи ватанэгьлийри чпин буржи намуслувилелди тамамарзава, женгера зурба игитвилер къалурзава. Гьукуматди ва шегьеррин, районрин муниципалитетри кьегьал рухвайрин ва абурун хизанрин патахъай датIана къайгъударвалзава. Идан гьакъиндай агъадихъ галай материалрини шагьидвалзава.

Ахцегь район

Райондин администрациядин кьил Аб­дул-Керим Палчаев махсус серенжемдин иштиракчи, Ухулрин хуьряй тир офицер Сульфидин Сулеймановахъ галаз гуьруьш­миш хьана.

С. Сулейманов мобилизация кьиле тухузвай вахтунда СВО-диз акъатна. Вич аватай частунин вилик акъвазнавай везифаяр тамамардайла, ухулвиди дирибашвал ва жуьрэтлувал къалурна. ЧIехи командиррин тапшуругъар викIегьвилелди тамамарзавай майор «Жуьрэтлувиляй» ордендиз ва «Дирибашвиляй» медалдиз лайихлу хьана.

Нубатдин женгина адал хер хьана. Сагъ хъхьун ва ялни ягъун патал ам са куьруь муддатда хуьруьз хтанвай. Сульфидина виликдай Россиядин армияда къуллугъайди я. Майорвилин чинда аваз ам отставкадиз фенвай. Адан чирвилер, вердишвилер герек атана.

Абдул-Керим Палчаева Сульфидинавай сагъламвилин гьалдикай, серенжемда иштиракдайла, кIеве гьатай месэлайрикай, яшайишдикай хабарар кьуна ва райондин администрация Ватан хуьзвайбурун гьар са месэла гьялиз, герек куьмекар гуз гьазур тирдакай лагьана.

Сульфидин Сулейманова дяведин махсус серенжемда иштиракзавайбурун патахъай къайгъу чIугунай райондин кьиле авайбуруз сагърай лагьана.

Кьурагь район

Дяведин махсус серенжемдив эгечIай гьа сифте йикъарилай Кьурагь райондин уьт­квем рухвайри женгер кьиле физвай гьар са чкада зиреквал, кьегьалвал къалурзава, Вилик эцигнавай везифаяр кьилиз акъудуник чпин лайихлу пай кутазва.

Кьурагьрин хуьряй тир Семедов Фаик махсус серенжемдин сифтегьан иштиракчийрикай сад я. Виридаз малум тир «Чун тахьайтIа, вуж жеда?» лозунгдин маналу гафар лап гьа Фаиказ кутугайбур я. 2022-йисан 21-сентябрдиз РФ-дин Президентди уьл­кведа мобилизациядин гьакъиндай малумарнай. Аниз сифте нубатда чпик кьетIен пешеяр квай, армияда къуллугънавай ксариз эвер гузвай. Уьлкве патал четин и вахтунда райондай, Ватандин итижар хуьз, хейлин гадаяр фена. Абурун арада 35 йисавай Фаик Семедовни авай. Уьмуьрдин юлдашдиз ва кьве веледдиз сагърай, «вири хъсан жеда» лагьана, ам военкоматдиз фена. Анай кьегьал Каспийскдиз рекье туна. Ина сифтегьан вердишвилер къачуна.  Алай вахтунда ам миллетбазрихъ галаз дирибашвилелди женг чIугвазвай тежрибалу аскер я.

Фаик Семедова уьмуьрдин пеше яз муаллимвал хкянавай. Мурад кьилиз акъудун патал ада Дербентда авай «Юждаг» институтни акьалтIарна. Тарсарив эгечIдалди касдиз Россиядин Армиядин жергейриз эвер гана. Ана ракетайрин частара намуслувилелди къуллугъна. Са шумудра диде-бубадиз командиррилай ада баркалла алаз къуллугъзавайдакай разивилин чарар хтанай. Аскервилин парталар дегишарайдалай гуьгъуьниз уьмуьрдин рекьерни маса патахъ элкъвена. Ам кеспи дегишаруниз мажбур хьана.

Фаик Семедован буба хайи чIалан ва литературадин муаллим, диде больницадин­ санитарка я. Гьакъисагъвилелди зегьмет чIуг­­вазвай диде-буба кьуд веледдиз гьар са рекьяй чешне я. ЧIехибурувай аялри хъсан тербия къачуна. Женгерин майданда­, яргъа аватIани, Фаика диде-буба фикирдай­ акъудзавач. Абурун дуьаяр, Аллагьдивай тIа­лабунар вичин патахъай, сагъ-са­ла­матдиз кIвализ хтуникай тирди чизва. Гьавиляй, гьар мумкинвал хьанмазди, ада багърийриз зенг ийизва, вичикай хабар гузва.

ВикIегьвилелди къуллугъзавай аскердиз командирри са шумуд сеферда отпуск гана. И йикъар кьве тереф патални лап шадбур тир. Аскерди дидедин хуьрекрин, хайи чилин няметрин дад акуна. Идалай еке бахт жедани аскердиз.

Аскердин уьмуьр регьятди туш. ДатIана гуьллейрин кIаник командиррин тапшуру­гъар­ тамамарзавайбурун кьилел текъвезвай дуьшуьшар авайди туш. Гьелбетда, жувахъ галаз санал фу пайзавай юлдашар телефни жезва, садбурал хирерни хьайила, гьайифди рикI кудай вахтарни жезва. Окоп­ра мекьивал, хуьрекар, ризкьи агакь тавур вахтар…  Са куьнизни килиг тавуна, аскервилин буржи тамамарун герек я. И кардин гъавурда махсус серенжемдин  вири иштиракчияр ава. Аферин, баркалла чпиз!

Мартдин юкьвара, сенгеррилай хкведайла, Фаик вичин юлдашарни галаз миллетбазрин гуьллейрик акатна. Залан хирер хьайибур Донецк шегьердин больницадиз агакьарна. Духтурри са шумуд юкъуз абурун уьмуьр патал  женг чIугуна. Алай вахтунда Фаика вичин хирер сагъар хъийизва.

Кьегьал рухвайрал чна дамахзава. Абуру Ватандин итижар хуьзва, чпин аскервилин буржи лайихлувилелди кьилиз акъудзава. Чи мурад сад я: Фаик Семедов, гьакI адан юлдашарни фад-фад сагъ хъхьун.

       Докъузпара район

И йикъара Докъузпара райондин кьил Мегьамед Шамилован тIварцIихъ дяведин махсус серенжемдин иштиракчи, Казбек райондин Дылым хуьряй тир Мегьамедов Мегьамед Иразхановичалай кагъаз атана. Ана кхьенвай:

«Ассаламуалейкум, гьуьрметлу Докъузпара райондин кьил ва Къаракуьре хуьруьн жемят! Махсус серенжемда иштиракдайла, зал хирер хьана ва зун Ростовдиз рекье туна. И шегьердин къвалав гвай Батайск станциядилай зун ва хирер хьанвай масабур РФ-дин оборонадин министерстводин санитарный поездда акьадарна. И поезддин начальник Докъузпара райондин Къаракуьре хуьряй тир майор Нажафкъулиев Малик Насирович тир. Чун тажубни  ва шадни хьана. Жуван ватанэгьли ихьтин еке къуллугъдал алайвиляй. Чаз акуна хьи, адаз вичин­ гъилик квайбурун ва начагъбурун арада еке авторитет авай. Адан гьар са гьерекатдай, кIвалахдай инсанвал, къенивал, регьимлувал, хирер сагъар хъийизвай аскеррив, офицеррив хуш рафтарвилелди эгечIун аквазвай. И гуьзел ерийри Малик Насировичан къанажагъ, ахлакь, марифат, инсанрив, вичин хсуси пешедив, буржидив эгечIун къалурзавай.

Аллагьдин эмирдалди зун кьвед лагьай сефердани гьа поезддиз аватна. Госпиталда за чи ватанэгьлидикай суьгьбетна, адан тарифарна. Ам акунмазди, за шаддаказ гьарайна ва жувахъ галайбуруз дамахдивди лагьана: «Ингье зи ватанэгьли. Адан гъилик акатай вири сагъ хъжезвайди я».

Майор Нажафкъулиеван лайихлувилер гзаф я. Зи ихтиярда авай кар тиртIа, адаз за Россиядин Игитвилин тIвар гудай. Адан инсанвиляй, сабурлувиляй, марифатлувиляй, тербиядай. Зун умудлу я, адан зегьметар лайихлувилелди къейдда. Докъузпара райондини, Къаракуьре хуьруьн жемятдини адаз тир гьалда гьуьрметда. Къуй Аллагь-Таалади гьахьтин хва чIехи авур диде-бубадиз чандин сагъвал ва бахтар гурай.

Гьуьрметдивди, Казбек райондин Дылым хуьряй тир  Мегьамед Мегьамедов».

Докъузпара райондин администрацияди ватанперес хва, Ватандин итижар жуьр­этлувилелди, намуслувилелди хуьзвай ви­кIегь офицер тербияламишунай Малик Нажафкъулиеван буба Насираз ва диде Рагьиматаз рикIин сидкьидай сагърай лугьузва. Райондин кьил Мегьамед Шамилова майордин диде-бубадив разивилин хуш келимаяр авай чар вахкана.

Мегьарамдхуьруьн район

Райондин администрацияда гатфарин­ призывдиз ва Россиядин Яракьлу Къуват­рин жергейриз икьрардин бинедаллаз агьа­лияр желб авунин месэладиз талукьарнавай совещание кьиле фена.

Мярекатда райондин администрациядин кьил Фарид Агьмедова, адан сад лагьай заместитель Фейрудин Рагьимханова, военный комиссар Эльман Гьажиева, жавабдар къуллугъчийри, хуьрерин администрацийрин кьилери иштиракна.

Мярекатдал рахай юлдашри гатфарин призывдикай, цIинин йисалай и месэладиз талукь яз ишлемишзавай дегишвилерикай ихтилатна. Икьрардин бинедаллаз армияда къуллугъиз кIанзавайбуруз вири журедин къулайвилер тешкилнавайдакай лагьана.

Райондин администрацияди агьалияр месэладин гъавурда тун патал «Самурдин сес» газетда лазим материалар чапзава. Фарид Агьмедова хуьрерин администрацийрин кьилеривай агьалияр дуьз гъавурда тун истемишна.

Хийир  Эмиров