Ахцегьа мергьяматлувилин кIвалахар ийизвай къени инсанар тIимил авач. Ахьтинбурукай бязибуру пулдин такьатар рекьер, къаналар, булахар ремонтуниз, гьакI хийирлу маса крариз харжзава. Гьелбетда, абуруз жемятди чухсагъул ва аферин лугьузва. Мергьяматлу касдиз гьамиша Аллагьдин регьимдик хьуналди сувабар кхьизва, адан малдик берекат кутазва, хата-балайрикай хуьзва.
Райцентрада яшамиш жезвай Надир Талхановни вичин хсуси пулдин такьатар менфятлу крариз харжзавай мергьяматлу ксарикай сад я. Акьван агьваллу кас туштIани, ада вичелай алакьзавай вахтунда хийирлу крар кьиле тухузва. КапI-тIеат ийизвай адаз, ихьтин кIвалахар авурла, Аллагь рази хьана, гунагьрилай гъил къачудайди чизва.
ИкI, мукьвара ада райвоенкоматдин ва 2-нумрадин АСОШ-дин вилик квай лап чIуру гьалдиз атанвай куьче къайдадиз хкун патал къум гъана ва ам вичи чала-чухурар авай чкайриз чукIурна. Школадин кьиле авай ксари, муаллимри, райвоенкоматдин къуллугъчийри Н.Талхановаз сагърай лугьузва.
Рагьидин Эминов
