Шариатдин ктабра къейднавайвал, Аллагьдин къудратдалди инсандин руьгь нурдикай халкьнава ва ам эбеди яз амукьзава. Къияматдин йикъалди кечмиш хьанвайбурун руьгьер сурара жезва. Гьавиляй сурар авай чкадихъ иесивилелди гелкъуьн еке сувабдин кар я. Амма уьмуьрда, гьайиф хьи, чал инсанри сурар чиркинарзавай, аниз чиз-чиз кIвалин гьайванарни къушар ахъайзавай дуьшуьшар расалмиш жезва. Ихьтин ксарин хиве еке гунагь гьатзава.
Кечмиш хьанвай инсанрин руьгьерив чалай агакь хъийизвайди анжах абуруз бахшна кIелзавай дуьаяр, гузвай садакьаяр ва сувабдин маса крар я. Кечмиш хьанвайбурун нагьакьан крарал машгъул веледар себеб яз лагьайтIа, абуруз азабар гузва. Дуьз рекьел алайбурун диде-бубайрин руьгьер архайин жеда.
Ахцегьрин райцентрадин Гуьней патан сурари фадлай инихъ инсанрин патай къайгъударвал истемишзавай. Гьар йисан гатфариз Аллагь рикIел алай инсанри ина рехъ гузвай татугайвилерикай талукь тир ксариз лагьайла, малар, данаяр къвезвай чкаяр са жуьре кIевириз башламишдай. Амма ана хъсан векь экъечIай вахтунда, зулуз дагълара векь амачирла, бязи агьалийри, сеткаяр ачухна, сурарин къенез малар, данаяр ахъайзавай. Абуру сурариз кIур гузвай, анаг чиркинарзавай. Идалайни гъейри, ана аялри футбол къугъвадай чкани тIуькIуьрнавай. Гзаф гуьмбетар чкIанвай. Бязи сурар, яд фена, ачух хьанвай.
И татугайвилер виридаз аквазвай, амма серенжемар кьабулдай кас авачир. Ингье са шумуд йис идалай вилик Ахцегьрин Гуьней пата яшамиш жезвай пенсионер Сефибег Сефибегова (шикилда) сурар тамамвилелди къайдадиз хкунин месэла вичел къачуна. И рекьяй кIвалахрив эгечIай сифте девирда ада сурарин мулкунал элкъвена янавай сеткаяр хкаж хъувуна, чкIанвай бетондин тумбаяр, цлар цIийи кьилелай эхцигна. Сурариз къвезвай ракIарарни къайдадиз хкана, абуруз ва жугъундин ракьун тIвалариз ширер яна. Сурарин къене авай гуьмбетар ремонтна. Иниз малар, данаяр язавайбурувай абур сурариз ракъур тавун патал кIевелай истемишна. И кардал ада вичи гуьзчивал ийиз хьана.
Са кьадар вахт идалай вилик и сурара чка лап тIимил амай. Гила С.Сефибегован чалишмишвилералди и месэла вахтуналди гьялиз хьанва. Патав гвай чилин бязи участокрин иесийри, мергьяматлувал къалуруналди, чпин бахчаяр сурарик кухтадай ихтияр гана. ЦIийи чкаярни элкъвена сеткадалди кIевна. Сурарин къеняй къвезвай цин хвални къайдадик кухтунва. И кардини ана яд гьатун акъвазарна. Къейд ийин, вири и кIвалахар арадиз атун сурарихъ гила халис иеси хьунихъ галаз алакъалу я.
— Сурар эхиратдин кIвал я, — лугьузва Сефибег Сефибегова. — Гьавиляй за жемятдивай анаг къайдада аваз хуьнин карда куьмекар гун тIалабзава. Сурарив къайгъударвилелди эгечIайла, чалай кечмиш хьанвайбурун руьгьер ва гьакI Сад тир Аллагьни рази жеда. Дуьшуьшдикай менфят къачуналди, заз мад ихьтин са тIалабун ийиз кIанзава. Сурара пайзавай вирибурун садакьаяр Аллагьди кьабулрай! Садакьа пай авурдалай кьулухъ арадал къвезвай зирзибил сурара тамир!
Гуьней патан сурар къайдадиз хкун патал мергьяматлувилин куьмекар гузвайбурни авачиз туш. Ахьтинбурукай яз “Сельсовет Ахтынский” СП-дин кьил Низами Эфендиев, ахцегьвияр тир Эльдар Сардаров, Вагъиф ва Фазил Къантимировар, Шемсидин Агъаев, Абдурагьман Абдурагьманов ва масабур къалуриз жеда. Вирибурун садакьаяр Аллагьди кьабулрай.
Сурара михьивал ва къайда хуьн патал чалишмишвалзавай сувабдин ва мергьяматлу вири крара къуй Аллагьди Сефибегаз куьмекрай.
Рагьидин Эминов
