Дагъустан Республикадин Гьукуматдин Председателдин заместитель Нариман Абдулмуталибов Къизилюрт шегьердизни райондиз мугьман хьана. Адахъ РД-дин промышленностдин ва алишверишдин, хуьруьн майишатдин ва недай суьрсетдин министерствойрин, карчивилин ва инвестицийрин рекьяй агентстводин векиларни галай.
Сифте нубатда Гьукуматдин делегация «Биополис» СПоК-диз фена. Карханадин председатель Мегьамед Гьажиева мугьманар суьрсет хуьдай гьамбарханадиз тухвана. Ада лагьайвал, республикадин «Хуьруьн майишат вилик тухунин ва хуьруьн майишатдин продукция, суьрсет маса гунин кIвалах къайдадик кутунин» госпрограммадин сергьятра аваз 2019-йисуз кооперативдиз 60 миллион манатдин грантдин куьмек гана.
Проектдин бинедаллаз 2 агъзур тонн хаммал гьакьдай гьамбархана эцигун лазим тир. Адан умуми къимет 100 миллион манатдиз барабар тир. Хсуси такьатарни (40 миллион манат) ишлемишуналди, 2020-йисуз проект кьилиз акъудна. Гьа са вахтунда кIвалахдин алава 20 чка арадал гъана, — къейдна М.Гьажиева.
Кооперативди хуьруьн майишатдин продукция маса къачузва ва гьамбарханада хуьзва. 2022-йисан нетижайрай СПоК-ди 37,51 миллион манат къазанжияр къачуна. Налогар яз 0,35 миллион манат гана.
Къизилюрт райондин Кироваул хуьре мугьманри А.Амиргьамзаева регьбервал гузвай лежбервилинни фермервилин майишатдал кьил чIугуна. Саки вад гектардин майданда некьияр битмишарзава. Кьве гектарда мереяр (малина) цанва. Гьар йисуз са гектарда 10-12 тонн майваяр битмишарзава.
А.Амиргьамзаева хиве кьурвал, эгер емишар кIватIдай махсус техника авайтIа, бегьердин кьадар мадни артухариз жедай.
Къизилюрт райондин Кульзеб хуьре Н.Абдулмуталибов як гьялдай кархана эцигзавай «Дагмясо» ООО-дизни фена.
Чи мухбир
