Алай йисан 1-октябрдилай Россиядин­ армиядиз жегьилриз зулун эвер гунив га­тIун­нава. Ам 31-декабрдалди давам жеда. Россиядин оборонадин министерстводи малумарнавайвал, зулуз уьлкведин армиядиз эвер гузвайбурун кьадар, гатфарин призывдин рекъемрив гекъигайла, тIимил я.

И ва маса делилрикай республикадин СМИ-рин векилриз «Дагестанская правда» газетдин майдандал тешкилнавай пресс-конференциядал  республикадин военком Даитбег Мустафаева лагьана.

Республикада 18 йис тамам хьанвай  сагълам жегьилар кьабулдай призывдин 53 комиссияди кIвалахзава. Призывдин пунктни вири терефрихъай гьазурнава. Дарамат бинедилай ремонт хъувунва, призывникриз вири жуьредин къулайвилер тешкилнава ва пункт герек вири тадаракралди, суьрсетдалди, военный парталралди таъминарнава.

Дагъустан Республикадай армиядин жергейриз 3500 кас тухуда. Сифтегьан дес­теяр 15-октябрдиз рекье твада. Жегьилар чпи къуллугъдай частариз автобусра, поездра ва самолетра аваз агакьарда.

Гьар са диде-бубадиз чир хьун лазим я, цIийи хъувунвай закондин бинедаллаз, армиядиз 18 йисалай 30 йисалди яшдавай жегьилриз эвер гузва. Вири мажбуридаказ медицинадин комиссиядай ахъайзава. Начагъвал квайбур ракъурзавач армиядиз. Им лап кар алай месэла я. ГьикI лагьайтIа, начагъвал квай са касни армияда герек къвезвач. Абурук рикIин азарар квайбур, давление 150/ 90 авайбур, катарактдик, глаукомадик вилерин ишигъ зайифбур, бишибур, отит, панкреатит, чахутка, гепатит, ВИЧ квайбур, руфун аватнавайбур, ратар хирери (язва) кьунвайбур, бубасил авайбур, куькбур, ракдин, психикадин азарар квайбур, писдиз чIалар галкIизвайбур акатзава.

Диде-бубайриз чир хьана кIанзавай мес­элаяр мад ава. Украинада кьиле тухуз­вай женгинин махсус серенжемда гила­ армиядиз эверзавайбуру иштиракдач. Анжах­ хушвал авай касди са йисан икьрар кутунайтIа, герек гьазурвал акурдалай кьулухъ, ам СВО-да авай частариз ракъурда.

Украинада кьиле физвай военный махсус­ серенжемдикай къурху аваз бязи диде-бу­байри чпин рухваяр военкоматриз ракъурзавач. Ихьтин крарал машгъул хьун герек туш. Вучиз лагьайтIа, жавабдарвилиз чIугвада.

Республикадин военкомди малумарайвал, закондин цIийи статьяйрин бинедаллаз, армиядикай кьил къакъудзавайбур жерме ийизва. Военкоматри, призывдин комиссийри, муниципалитетри ихьтин гьалариз рехъ гайитIа, абур 300-500 агъзур манатдин жерме ийизва: повестка вугана, себеб авачиз военкоматдиз татай призывник 10-30 агъзур манатдин (виликдай 1-5 агъзур), масаниз ва я чара уьлкведиз фейидакай военкоматдиз хабар тавур жегьил 5-15 агъзур манатдин, медицинадин комиссиядикай кьил къакъудзавайбур 15-20 агъзур манатдин.

Закондин бинедаллаз, вахтуналди армияда къуллугъ авуникай акъвазарни ийизва. ИкI, отсрочка вузрин студентриз, аспирантриз (очно кIелзавай), лазим тир аккредитация авай компанийрин къуллугъчийриз, кьве ва адалай виниз яш тамам тахьанвай аялар авай бубайриз, набут аял (пуд йис жедалди) авайбуруз, кьилди аял хуьзвайбуруз, уьмуьрдин юлдаш кIвачел заланзаваз хьайитIа, лап гьалдай фенвай  мукьва-кьилийрихъ гелкъвезвайбуруз, кьуьзуь диде-бубайрин къаюмвал ийизвайбуруз гузва.

Абад Азадов