29-сентябрдиз Дербент райондин Белиж поселокдин 2-нумрадин школада Украинада кьиле физвай махсус серенжемда телеф хьайи, и школада кIелай лейтенант Назим Маилович Османоваз мемориалдин кьул ачухай митинг кьиле фена.
Назим Османов 1977-йисуз Белиждин консервияр акъуддай заводдин цехдин начальник Маилан хизанда дидедиз хьана. 1985-1987-йисара ада Советрин Армиядин жергейра къуллугъна. Дагъустандин педагогвилин институтдин математикадин факультет акьалтIарайла, ада Белиж поселокдин 8-нумрадин агролицейда производстводай чирвилер гудай мастервиле кIвалахна. 2006-2022-йисара Белиж поселокдин 3-нумрадин школада муаллим яз зегьмет чIугуна.
2022-йисан 22-сентябрдиз Н.Османоваз махсус серенжемда иштиракиз эверна. Гьужумдин (штурмовой) дестеда къуллугъ авур кIуьд вацра ада вич халис кьегьал хьиз къалурна. 2023-йисан 17-июндиз Запорожский областдин Работино хуьруьн къваларив фейи къати женгина ам, залан хирер хьана, телеф хьана. Махсус серенжемда къалурай дирибашвиляй ва викIегьвиляй РФ-дин Президентдин Указдалди лейтенант Назим Османоваз «Жуьрэтлувиляй» орден ганва. Адахъ кьве велед авай.
Митингда лейтенантдин диде Ларисади, вах Назлуди, уьмуьрдин юлдаш Миланади, Дербент райондин кьил Мавсум Рагьимова, Белиж поселокдин кьил Рамиз Гьабибулаева, райондин управленийрин руководителри, школайрин директорри, 3-нумрадин школадин муаллимри, жемиятдин тешкилатрин векилри, агьалийри ва школьникри иштиракна.
— Чи везифа игитрин кьегьалвилер рикIел хвена, абур акьалтзавай несилдив агакьарун я. Къе чна школадин цлал ачухнавай мемориалдин кьул — им халисан игитри къалурай кьегьалвилерин чешне я. Чун Ватан хуьз къе женгера иштиракзавай гьар са аскердин тIвар школадин, поселокдин, райондин тарихда пакдиз рикIел хуьниз буржлу я. Гьуьрметлу игитдин багърияр, чи ЧIехи уьлкве патал кьегьал рухваяр тербияламишунай чна квез, кьил агъузна, икрамзава, — лагьана М. Рагьимова.
Мемориалдин кьул Мавсум Рагьимова, игитдин багърияр тир Лариса Османовади ва Назлу Асалиевади ачухна.
Са декьикьада кисна акъвазайдалай гуьгъуьниз мемориалдин кьулунал цуькверин кIунчIар эцигна.
Къагьриман Ибрагьимов
