И мукьвара Кьасумхуьрел шаир ва журналист Мердали Жалилован 80 йисан юбилейдиз талукьарнавай шадвилин мярекат кьиле фена. СтIал Сулейманан райондин культурадин отделдин куьмекдалди гьазурнавай и межлис райондин культурадин кIвалин залда кьиле фена.
Межлис кьиле тухузвай телевиденидин журналист Музамудин Магьмудова шаирдин уьмуьрдикайни яратмишунрикай куьруь гаф лагьайдалай кьулухъ атанвай мугьманризни чкадин агьалийриз рахадай мумкинвал гана.
Инал рахайбурун арада Дагъустандин халкьдин шаир Майрудин Бабаханов, лезги писателрин Союздин правленидин регьбер Абил Сардар, Дагъустандин писателрин Союздин секретарь Максим Алимов, Герейханован совхоздин 1-отделенидин школадин муаллим-методист Сегьерханум Османова, Нидерландра яшамиш жезвай шаир Гуьлжагьан Мисриханова, Хив райондин Фригърин школадин муаллим-шаир Абдул Ашурагъаев ва масабур авай.
Инал гьакIни музыкадин искусстводин векилри чпин манийралди мярекат мадни итижлуди ва шадди авуна. Са хейлин суалриз жавабар гайидалай кьулухъ юбилярди вичин рахунра и межлис туькIуьрайбуруз ва иштирак авурбуруз сагърай лагьана.
М.Тагьиров
