Дагъустандин Гьукуматда республикада куьтуьмрин кьадар артухаруниз куьмекдай серенжемар веревирдна

31-майдиз РД-дин Гьукуматдин Председателдин заместитель Нариман Абдулмуталибова республикада куьтуьмар кьунин ва и жинсинин балугъар туьретмишунин месэлайриз талукьарнавай совещание кьиле тухвана.

“Всероссийский научно-исследовательский институт рыбного хозяйства и океанографии” ФГБУ-дин Ученый советдин биологиядин секциядин заседанидин протоколдал асаслу яз, республикада куьтуьмдин жинсиник акатзавай балугъар кьунин жигьетдай алай йисуз тайинарнавай кьадар ава: санлай къачурла — 33 тонн.

РД-дин балугърин майишатдин рекьяй кардик квай комитетдин председатель Виктор Руденкоди къейд авурвал, куьтуьмдин жинсинин балугърин кьадар тIимил хьуниз 1990-2000-йисара браконьеррин гьерекатри таъсирна. Эхиримжи 10-15-йисан къене куьтуьмар тIебии шартIара туьретмишунин нетижада гьалар пайгардик ахкатиз гатIуннава.

Рекъемрикай рахайтIа, 2015-2021-йисара, «Главное бассейновое управление по рыболовству и сохранению водных биологических ресурсов» ФГБУ-дин Терско-Каспийскдин филиалдин делилралди, тIебии шартIара 102,8 миллион куьтуьмдин кIезрияр туьретмишнава.

“ВНИРО” (КаспНИРХ) ФГБНУ-дин Волжско-Каспийский филиалдин “Западно-Каспийский” отделдин начальник Тимур Абдусамадова гьисабзавайвал, республикада куьтуьмар кьунал вахтуналди къадагъа эцигунин игьтияж ава. Илимдин рекьяй кьиле тухвай ахтармишунри къалурзавайвал, Дагъустанда промышленностдин макьсадар аваз кьадай куьтуьмар бес кьадар авач.

Н.Абдулмуталибова, совещанидин нетижаяр кьадайла, къейд авурвал, къанунсуздаказ балугъар кьунал гуьзчивал тухузвай органрин кIвалах мадни гужлу авун ва тIебии шартIара туьретмишзавай кIезрийрин кьадар йисан къене 100 миллиондив агакьарун герек я.

«Лезги газет»