Россиядин Президент Владимир Путина уьлкведин агьалийриз куьмек яз малумарнавай цIийи серенжемар алукьнавай вацралай къуватда гьатнава. Дагъустандин Кьил Сергей Меликован Телеграм-каналди хабар гузвайвал, дегишвилер сифте нубатда пенсионерриз, тIимил таъминвал авай хизанриз, жегьил дидейриз талукь я. Агьалийрин уьмуьрдин яргъивилел ва аялар гзаф хьунал гьалтайла вилик жергейра авай Дагъустан патал и къараррихъ иллаки еке важиблувал ава.
Къенин юкъуз Донбассда ислягьвал тун ва Россиядин хатасузвал хуьн патал чи военный къуллугъчийри Украинада женг тухузва. Гьаниз килигна, уьлкведин кьили махсус серенжемда иштиракзавайбур, гьакIни ана хирер-кьацIар хьанвайбур ва анрай кIвализ элкъвена хтун кьисмет тахьайбурун хизанар патал пулдин куьмекар гун акьалтIай гьахълу къарар яз гьисабзава.
ИкI, 1-июндилай гьукуматди гузвай са жерге маса пуларин кьадарни артухарнава:
— яшамиш хьун патал тайинарнавай пулунин агъа кIанин кьадар — 10 %, адахъ галаз сад хьиз, и пулунилай аслу аялрин са жерге пособийрин кьадарни;
— МРОТ — 10 %;
— кIвалах тийизвай пенсионеррин пенсия — 10 %;
— военный рекьяй къуллугъзавай дишегьлийриз аялдин 1,5 йис тамам жедалди адахъ гелкъуьн патал гузвай пулунин кьадар — кьве сеферда;
— аялар галай хизанрив ва тIимил таъминвал авай диде-бубадив гьукуматдин патай куьмек агакьун давам жеда;
— гьукуматди агьалийрихъ галаз чпин агьвал хъсанарун патал яшайишдин рекьяй къарарар кутIунун инлай кьулухъни давамарда.
Вири и къараррикай агьалийриз чкайрал гьасятда хабар гун лазим я, ихьтин тапшуругъ гьукумдин органрин ва муниципалитетрин кьиле авай ксарин вилик эцигзава.
«Лезги газет»
