“Газпром межрегионгаз Махачкъала” ООО-ди муьштерийрин рикIел хкизвайвал, 2021-йисан эвелдилай башламишна ишлемишнавай газ гьисабдиз къачузвай приборар ахтармишунал, газдин гьакъи вахтунда ва я тамамдаказ тагунай жерме ва я пеня илитIунал ва ам истемишунал эцигнавай къадагъа (мараторий) къуватдай аватнава, хабар гузва идарадин информациядин къуллугъди.
И кардал къадагъа 2020-йисан 2-апрелдиз РФ-дин Гьукуматди кьабулай “Гзаф квартирайрикай ибарат дараматра авай ва яшайишдин кьилдин кIвалерин иесийрив ва абур ишлемишзавай ксарив коммунальный къуллугъар агакьарунин кьетIенвилерин гьакъиндай” къарардин бинедаллаз эцигнавай.
Им акI лагьай чIал я хьи, чпин кIвалера авай счетчикар ахтармишдай вахт алатнавай ва я мукьвал вахтунда алатун лазим тир вири муьштерийри газ гьисабдиз къачудай яшайишда ишлемишзавай приборар ахтармишдай ихтияр авай метрологиядин махсус гьи тешкилатдиз хьайитIани тади гьалда арза кхьин лазим я.
Закондин бинедаллаз, газ гьисабдиз къачудай прибор ахтармишна кIанзавай вахтунал адан иесиди — газ ишлемишзавай касди гуьзчивална кIанзава. Ахтармишдай вахт алатзавайди рикIел гъун газдалди таъминарзавай карханадин хиве авай везифа туш. “Газпром межрегионгаз Махачкъала” ООО-ди лагьайтIа, газ ишлемишзавай касдин дикъетсузвал себеб яз адал нормативдин бинедаллаз винел хъивегьай гьакъи татун патал, вичин муьштерияр хабардарзава.
Счетчик ахтармишнавай вахтуниз фикир це: ам прибордин паспортда къалурнава. Эгер ахтармишна кIанзавай вахт ахъаяйтIа, счетчикди къалурзавай делилар дуьзбур тушиз гьисабда ва ишлемишнавай газдай гьакъи нормативрал бинеламиш хьана гьисабиз башламишда.
Счетчик ахтармишдай вахт алукьнавайдакай газдалди таъминарзавай карханади вичин абонентар гьар вацра гузвай квитанциядин куьмекдалди хабардарзава. И вахт гьакIни телефондин 8-800-200-98-04 нумрадай Сall-центрадиз зенг авуна чириз жеда.
«Лезги газет»
