И мукьвара Росгвардиядин Дагъустан Республикада авай Управленида кьиле фейи гегьенш заседанидал 2022- йисан нетижаяр кьуна ва цIийи йисуз вилик эцигзавай месэлаяр веревирдна. Ана Россиядин Федерациядин милли гвардиядин Кеферпатан Кавказдин округдин командующийдин техникадин ва яракьрин рекьяй заместитель, генерал-майор Игит Манафова, Росгвардиядин Дагъустан Республикада авай Управленидин начальник, полковник Александр Орехова, махсус ва гьакIни территориальный органдин къурулушдик акатзавай вири подразделенийрин командирри иштиракна.
Совещанидин сергьятра аваз Управленидин къурулушдик акатзавай са жерге подразделенийрин начальникри кьиле тухванвай кIвалахдиз талукь докладар авуна. Кьилди къачуртIа, алатзавай йисуз, федеральный властдин органрин къуллугъчийрихъ галаз сих алакъада аваз кIвалахуналди, вилик эцигнавай 2 агъзурдалай виниз месэлаяр кьилиз акъуднавайди къейдна. Кьилин фикир терроризмдихъ ва экстремизмдихъ галаз женг чIугуниз гана.
Мярекатдал А.Орехов 2023-йисуз вилик эцигзавай месэлайрални гегьеншдиз акъвазна. Ада къейд авурвал, кьилин фикир гудай месэлайрик, гьа виликдай хьиз, терроризмдихъ ва экстремизмдихъ галаз женг чIугун, общественный къайдаяр ва хатасузвал хуьна иштиракун, гьукумдин важиблу объектар хуьн ва икI мад акатзава. Умуми нетижаяр кьадайла, ада 2022-йисуз вилик эцигнавай вири месэлаяр кьилиз акъуднавайди къейдна.
— Алатзавай йисуз Управлениди чIехи кIвалах кьиле тухвана. Зун умудлу я, Верховный Главнокомандующийди, Федеральный къуллугъдин кьушунрин милли гвардиядин командованиди вилик эцигнавай везифаяр региондин Управенидин личный составди инлай кьулухъни намуслудаказ ва гьакъисагъвилелди кьилиз акъудда. Чи девиз сад я : “Всегда на страже!” — алава хъувуна ада.
Росгвардиядин Кеферпатан Кавказдин округдин командованидин тIварунихъай кIватI хьанвайбурухъ элкъвена рахай Игит Манафова къазанмишнавай агалкьунрай сагърай лагьана. Росгвардиядин къуллугъчийриз ва абурун хизанриз алукьзавай ЦIийи йис мубаракна. Кьилел михьи цав, дуьньяда мублагьвал ва хизанра хушбахтлувал хьана кIанивилин келимаяр лагьана.
Гегьенш заседанидин эхирдай кIвалахда тафаватлу хьайи са жерге къуллугъчийрив чухсагъулдин чарар ва къиметлу пишкешар вахкана.
Рагнеда Рамалданова
