Уьлкведин вузра кIелунин 2022/23-йисар патал хьун лазим тир бюджетдин чкайрин кьадар тайинарнава. Талукь тир къарардал алатай гьафтеда Россиядин кьилин образованидин ва илимдин министр Валерий Фалькова къул чIугуна, хабар гузва идарадин информациядин къуллугъди.
Алай йисуз вузрин арада бюджетдин гьисабдай тир 588 агъзур чка пайда. Образованидин вири дережайриз талукь чкайрин кьадар, алатай йисав гекъигайла, 11 561-дан гзаф хьанва. Виридалайни гзаф кьадарда аваз йикъан (очный) магистратурадин программайриз талукь чкайрин кьадар артухарнава. Аниз бюджетдин гьисабдай кьабулзавайбурун кьадар эхиримжи 5 йисан вахтунда сифте сеферда яз гзафарнава. ИкI, магистратурадин чкаяр 5,7 агъзурдан артух ва санлай къачурла 103,1 агъзурдаз барабар хьанва. Жегьил алимар-ахтармишунардайбур гзаф хьунин макьсаддалди аспирантурада авай бюджетдин чкаярни артухарнава — вузрин ва илимдин тешкилатрин арада 17,5 агъзур чка пайда. Ординатурада пайзавай чкайрин кьадарни и йисуз 2,4 агъзурдан гзафарда ва санлай къачурла 19,7 агъзурдав агакьда. Бюджетдин гьисабдай, яни пулсуздаказ ординатурадиз кьабулдай чкаяр 13% виниз артухарунин бинеда здравоохраненидин къурулушда арадал атанвай духтуррин кьитвал яваш-яваш тIимиларун ава.
РикIел хкин, РФ-дин Президент Владимир Путинан къарардалди, 2024-йис алукьдалди, гьар жуьредин регионра арадал атанвай гьалар фикирда кьуна, йисалай-суз артухардайвал я.
«Лезги газет»
