РФ-дин премьер-министр Михаил Мишустина “Вуздик онлайн-жуьреда экечIун” суперсервисди кIвалахунин къайда тестикьарнава. Идан гьакъиндай гьукуматдин къарар январдин эвелдай ихтиярриз талукь делилрин официальный интернет-порталда чапнава.
ЦIийи къайдадин бинедаллаз, абитуриентривай вузрик экечIунин кампаниядал яргъал мензилда аваз гуьзчивал ийиз жеда. Чпин гьерекатар абуру электронный къулуналди тестикьарун лазим жеда.
“Суперсервисдин сад лагьай пай уьмуьрдиз кечирмишунин макьсад образованидин тешкилатриз, чирвилер гун патал, мектебар акьалтIарнавай жегьилар кьабулунин мумкинвал таъминарун я”, — къейднава документда.
Сервисдин кIвалахдал пуд идаради: РФ-дин рекъемрин кIвалах виликди тухунин, алакъадин ва массовый коммуникацийрин, гьакIни кьилин образованидин ва илимдин министерствойри ва Рособрнадзорди гуьзчивалда.
“Вуздик онлайн-жуьреда экечIун” сервис Госкъуллугърин сайтда 2020-йисан 20-июндиз кардик кутунай. Сифте кьиляй адак Россиядин 54 вуз экечIнай, 2021-йисуз аник мад 100-далай виниз вузар экечIун гуьзлемишзавай. Пландик кутунвайвал, вири уьлкведин майданда и къайдади тамамдиз 2022-йисалай кIвалахун лазим я.
Вуздик экечIун патал документар гила кьабулдай комиссиядиз тефена, яни яргъал мензилда аваз вугуз жеда. И кар патал вуздик экечIиз кIанзавай касди электронный къулунин сертификат къачун лазим я. Мад са кьетIенвал адакай ибарат я хьи, гила документар рекье тун патал ЕГЭ-дин нетижаяр малум жедалди акъвазун герек туш. Арзаяр 20-июндилай 17-августдалди кьабулда.
“Вуздик онлайн-жуьреда экечIун” сервисдин куьмекдалди гила абитуриентривай жеда: экечIдай вуз хкягъиз; адак экечIун патал лазим арза ва документар рекье тваз; алава тир имтигьанар кьиле тухудай вахт чириз; конкурсдин сиягьра чпи кьунвай чкаяр вилив хуьз; арзадик дегишвилер кухтаз; вуздиз кьабулнавайдакай чириз. Вири и гьерекатар Госкъуллугърин www.gosuslugi.ru сайтдин куьмекдалди кьилиз акъудиз жезва.
«Лезги газет»
