Гьар са инсандиз вичин халкьдин тарих, меденият ва адетар чир хьун хъсан я. И делилди чаз чи дувулар, ери-бине чизвайди тестикьарзава. Амма алай девирда акьалтзавай несилдиз и кар чирун къвердавай четин жезва. Мектебда кIелзавай аялриз чи халкьдин адетар, милли хуьрекар, манияр чизмач ва, зи фикирдалди, абур чирдайбур йисалай-суз тIимил жезва.
Мукьвара чна медениятдин къуллугъчидин югъ къейднай. Идахъ галаз алакъалу яз, эхирни зи тербияламишунин планда фадлай авай са фикир кьилиз акъуддай мумкинвал хьана. Имни аялар сиягьатдиз тухун тир.
ТIатIилар башламишай йикъалай гьаваяр чIур хьана, виш йисаралди такъвай хьтин къати марфар къвана, мекьивилер хъхьана. Эхирни гьава ачух хьанмазди, чун, 5-7-классра кIелзавай аялрин са дестени муаллимар, СтIал Сулейманан райондиз рекье гьатна. Сифте чун ХХ асирдин Гомеран музейдиз фена. Ана аялар музейдин къуллугъчи Фейзудин Мамедова хушдиз къаршиламишна. Ада аялриз шаирдин уьмуьрдикай, яратмишунрикай итижлу суьгьбетар авуна. СтIал Сулейман яшамиш хьайи кIвал, адан бахча, музейдин экспонатар абуруз чпин вилералди акуна. Ф. Мамедова аялриз ва аялри гьадаз гайи суалри, жавабри вири рази яз туна. Чи фикирда Алкьвадрал финни авай. Чун гьаниз рекье гьатна. И хуьруьз чун сифте сефер яз физвай.
Ингье чун чкадив агакьна. Музейда мугьманар лап хушвилелди къаршиламишна. Валида Гьуьсейновади чи аялриз Алкьвадар Гьасан эфендидин уьмуьрдикай, яратмишунрин алемдикай, музейда авай стендрикай, абур талукьарнавай машгьур, чи медениятда кьетIен гел тунвай векилрикай суьгьбетарна. Чнани, муаллимри, и музейдин тарихдин ктабда гел амукьдайвал, чи патай хуш келимаяр кхьена. Идалай гуьгъуьниз чун вири гьевеслудаказ ресторандиз фена, фу тIуьна. Са гафуналди, аяларни, муаллимарни, сиягьат кьиле тухвай ксарни рази яз амукьна.
Сиягьатдин кьилин мурад аялриз чи халкьдин баркаллу векилрин уьмуьр фейи чкаяр къалурун, хайи Ватан, чIални эдебият кIанарун, къунши райондин мулкар къалурун, дуствилин алакъаяр мягькемарун тир. Заз музейрихъ рикI гваз гелкъвез, ана авай экспонатар хъсан гьалда хуьз алахъзавай, зегьмет чIугвазвай ксариз сагърай лугьуз кIанзава. Къуй абурухъ сагъвал, ачух гуьгьуьлар, такьатар, шадвилер хьурай!
Фатима Мирзегьасанова,
Мегьарамдхуьруьн 2-нумрадин юкьван мектебдин муаллим
