Сагъламвилин мумкинвилер сергьят­ламишнавай ксар яшайшдин кIва­ле­рал­ди таъминарун патал кардик кутунвай госпрограммадин бинедаллаз­ 1-апрелдилай арзаяр кьабулунив эгечI­нава.

Инвалидар ва инвалидар авай хизанар патал яшайишдин къулайвилер арадал гъуниз талукь программади абурун хсуси кIвал хьунин мурад кьилиз акъуддай мумкинвал гузва.

Программадин куьмекдалди кIвал маса къачудай пулунин такьатар чара ийизва. Субсидияр яшамиш жедай чкадихъ игь­тияж авайбурун сиягьдик квайбуруз чара ийизва.

Галай-галайвал малуматар герекзавайбурувай ва, программадин сергьятра аваз, арза вугуз кIанзавайбурувай мукьвал алай «Зи Документар» (МФЦ) центрадай чириз жеда. Идарадин пешекарри куьлуь-шуьлуьйрин патахъайни гъавурда твада, гьакIни арза вугун патал герек документарни гьазурда.

Арзаяр алай йисан 1-апрелдилай 1-июл­далди кьабулзава.

Техникадин ­такьатар

Залан азардик начагъбурун уьмуьр рег­ьятарзавай затIариз реабилитациядин­ технический такьатар лугьузва, куьрелди — ТСР.

Инвалидвал авай инсанриз реабилитациядин техникадин такьатар государстводи гьавая гузва. Амма абур къачун патал медицинадинни яшайишдин экспертиза (МСЭ) кьиле тухун ва инвалидвал (документралди) тестикьарун лазим я.

ТСР къачуз ва я абур дегишариз кIан­­завайбуру «Зи Документар» идарадиз­ ихь­тин документар тухун герек я: паспорт; МСЭ-дин справка, реабилитациядин­ кьилдин программадин карта; хайивилин гьа­къиндай шагьадатнама; инвалиддин ва адан диде-бубадикай садан СНИЛС.

«Лезги газет»