Мартдин эхирра са шумуд юкъуз Орёл шегьердин «Гринн-центр» спорткомплексда азаддаказ кьуршахар кьунай 18 йисал къведалди яшара авай жегьилрин арада уьлкведин кIвенкIвечивал патал акъажунар кьиле фена. Ана чи ватанэгьлийрини иштиракна, хъсан нетижаяр къазанмишна.
Акъажунрин сифтегьан юкъуз 45, 48 ва 51 кг-дин заланвилин категорийрай жегьилар гьасиррал экъечIна. Абурун арадай тир, Белиждин спортшколада вердишвилер къачунвай (тренер — Вагиф Къазиев) Агъаширин Агъаширинова финалдиз акъатдалди 4 бягьсина инанмишвилелди гъалибвал къазанмишна. Финалда лагьайтIа, адаз алатай йисан Европадин кIвенкIвечи, Тувадай тир Чингис Сарыгъларахъ галаз къуватар ахтармишун кьисмет хьана. Бягьс чи ватанэгьлиди 2:0 гьисабдалди гъалибвал къазанмишуналди акьалтIна.
Заланвилин и категорияда чи мад са ватанэгьлиди гъалибвал къазанмишна. Махачкъалада Гь.Гьамидован тIварунихъ галай спортшколада вичин устадвал хкажзавай Махач Абдуллаеваз буьруьнждин медаль патал финалда Краснодардин крайдай тир Мурат Пкин 10:1 гьисабдалди кумукьна.
Уьлкведин кIвенкIвечивал патал акъажунра 92 кг-дин заланвал авайбурун арада чи ватанэгьли Алимирза Абдулкъадировани буьруьнждин медаль къазанмишна. Акъажунрин сифте кьиляй Родион Санакоевахъ галаз адан бягьс 1:1 гьисабдалди акьалтIна. Буьруьнждин медаль патал вири 4 бягьсни, гьа гьисабдай яз, гъвечIи финални ада инанмишвилелди гъалибвилер къазанмишуналди акьалтIарна.
Рагнеда Рамалданова
