Бажарагълу алим ва карчи тир Имамедин Агъабалаев учредитель яз Дербент шегьерда ачухнавай ва вичелни СтIал Сулейманан тIвар алай социально-педагогический институт чи республикада кьилдин ксари кардик кутунвай хъсан вузрикай сад я. Чирвилерин и макан “Россиядин виридалайни хъсан 100 кархана ва тешкилат” конкурсдин гъалибчи хьуни идан гьакъиндай шагьидвалзава. Институтдихъ 1996-йисалай гатIунна акъудзавай “Жегьилрин сес” тIвар алай газет, хсуси чапханани ава.
Институтдихъ “Агъабала” тIвар алаз мергьяматлувилин фондни хьунал СПИ-дин коллективди гьахълудаказ дамахзава. Кьиле И.Агъабалев авай и фондунин такьатралди чпиз игьтияж авай студентриз куьмекар гузва, яратмишдай бажарагълу авторрин ктабар ва буклетар акъудзава. ИкI, 2015-йисуз “Агъабала” фондуни 500 экземплярдин тираж аваз тIвар-ван авай шаир ва ашукь Сакит Куьчеридин (Къурбанов) шииррин кIватIал, алай йисузни “Альфаграф” издательствода “Лекьерин мука экв” тIвар алаз рутулрин шаир Аскер Хинелудин (Мамедов) ктаб акъуднава.
— Чун инлай кьулухъни мергьяматлувилин “Агъабала” фондунин такьатралди Кьиблепатан Дагъустандин вири миллетрин векилар тир бажарагълу шаиррин ва зарийрин ктабар акъудиз гьазур я, — лугьузва Имамедин Агъабалаева.
Сагърай ихьтин кьегьал рухваяр!
Нариман Къарибов
