Махачкъала шегьердин 13-гимназияда Советрин Союздин Игит, лётчик Валентин Эмиров телеф хьана 75 йисаз ва Кавказ патал женгера чи кьушунар гъалиб хьуниз талукь яз “Ватанди ваз ихтибарзава” военно-патриотический клубдин мярекат кьиле фена. Чи ватанэгьли, “Лезги газетдин” дуст, даях, и школадин муаллим, жегьилрин насигьатчи Низам Шахбанова ва 13-гимназиядин бинедаллаз ам кьиле акъвазна кардик квай “Ватанди ваз ихтибарзава” клубди тешкилай и мярекат гурлудаказ кьиле фена.
Муаллимрин къаюмвилик кваз аялри кьиле тухвай и мярекатдиз шегьердин са жерге школайрин векилар, Валентин Эмирован хтул Гуьлнисе Эмирова, Игитдин стха, РАН-дин ДНЦ-дин илимдин къуллугъчи, технический илимрин доктор Субгьанверди Эмиров, Дагъустан Республикадин ветеранрин Союздин председатель, полковник Магьарам Алижанов, ВДПО-дин председателдин заместитель Марьям Мустафаева, Махачкъала шегьердин военкоматдин отделдин начальник, запасда авай подполковник Альберт Рагьимов, юстициядин отставкада авай полковник, РД-дин лайихлу юрист Багъир Ражабов ва гзаф маса мугьманар, 13-гимназиядин гьакъикъи дустар-амадагар атанвай.
КIватI хьанвайбур тебрикуналди, мярекат “Ватанди ваз ихтибарзава” клубдин векилди ачухна. Аялри Валентин Эмирован игитвилер рикIел хкана, адан уьмуьрдин ва женгинин рекьикай суьгьбетна, Кавказ патал кьиле фейи женгер, яшлубуруни дишегьлийри, гьакI аялрини Кавказ хуьн патал чIугур зегьметар, игитар садрани рикIелай алуд тавун лазим тирди къейдна. Абуру ватанпересвилин манияр тамамарна, куьруь тамашаяр къалурна.
Микрофондихъ атай Гуьлнисе Эмировади Валентин Эмироваз бахшнавай ихьтин хъсан мярекат тешкилунай гимназиядин директордиз, муаллимриз ва аялриз сагърай лагьана.
Профессор Субгьанверди Эмирова, Кавказ къачуз кIанз, фашистри авур гьужумрикай, вичин жегьил вахтар рикIел хкана, а девирдин Махачкъаладикай, ина кьиле фейи са жерге вакъиайрикай суьгьбетарна.
— Ихьтин мярекатрин, ачух тарсарин куьмекдалди жегьилар чи тарих, игитрин гьунарлувилер чирунал желбун лап важиблу я. Тарих чин тийиз, гележегни жедач, — къейдна ада.
Альберт Рагьимова жегьилриз халис ватанпересар хьуниз эвер гана, гьар са ученикдин вилик квай важиблу месэла чирвилер къачун, хъсан пешекар хьун, гьар са россиявиди вичин акьулдалди, пешекарвилелди гъалибвилер къазанмишун лазим тирди лагьана.
Мярекатдал рахай гьар са касди гележегдин несилриз дявеяр такун, ислягьвал хьун алхишна, алай девирда виридалайни зурба яракь дерин чирвилер тирди къейдна.
13-гимназияда кардик квай кружокрин членар тир аялри ватанпересвилин темадай шиирар кIелна ва манияр лагьана.
Альберт Рагьимова и мукьвара призывникрин йикъаз талукь яз кьиле фейи акъажунра тафаватлу хьайи ученикривни абуруз ватанпересвилин тербия гузвай муаллимрив грамотаяр вахкана.
Дагъви Шериф
