Чи ватанэгьлияр — гьар сана
Алай вахтунда Москвада агалкьунралди духтурвиле кIвалахзавайбурун жергеда Амира Загьировна Вагьабовани ава. Ам акушер-гинеколог, ультразвуковой диагностикадин духтур, Россиядин эстетикадин гинекологиядин пешекаррин ассоциациядин, онкологрин-маммологрин ассоциациядин член я.
Амира Вагьабова 1987-йисан 21-августдиз Махачкъалада Россиядин государстводин деятель, тIвар-ван авай алим, министрвилин къуллугъ кьилиз акъудай Загьир Арухован хизанда дидедиз хьана.
Ада акушервилин ва гинекологиядин хел вичи хкяна. Сифте мектеб, ахпа медалдалди медико-биологический лицей куьтягьна, гуьгъуьнлай Дагъустандин гьукуматдин медицинадин академиядани (2003-2009-йисар) агалкьунралди кIелна. 2009-2011-йисара РД-дин здравоохраненидин министерстводин патай Н.И.Пирогован тIварцIихъ галай РГМУ-да ординатурада медицинадин рекьяй мадни артух чирвилер къачуна. Н.В.Склифосовскийдин тIварцIихъ галай тIвар-ван авай тади куьмекдин НИИ-да УЗИ-дин рекьяй пешекарвилин дережа къачуна. Зегьметдин рехъ ада 2017-йисалай гатIунна.
Медакадемияда 4-курсуна кIелдай чIавуз ам аялар хадай кIвале практикада ва гьа чIавуз гележегдин духтур акушервилин пешедал ашукь хьана.
Медицинадин кIвалахдин куьлуь-шуьлуьйрайни кьил акъудиз кIан хьунин гьевесди адав, гьич са лекцияни, семинарни ахъай тавуна, лап хъсандиз кIелиз туна.
Гуьгъуьнлай жегьилдин уьмуьрда рикI къарсурай агьвалат арадал атана… 2005-йисуз, Амира 17 йиса авайла, адан буба Загьир Сабировичан, РД-дин милли сиясатдин, динрин крарин ва къецепатан алакъайрин министрдин чандиз вагьши террористри къаст авуна.
“За адаз “чан буба” лугьудай. Ам зи рикIел хъуьтуьл, лазим тир истемишунар ийидай, рикIи чIугвадай инсан яз алама, — буба рикIел хкизва Амиради. — Лайихлу инсандиз хас тир ерияр авай адахъ: регьимлувал, хци акьул, викIегьвал ва хъуьтуьл рикI. Ада зак лувар кутазвай. Ам зи компас, заз рехъ къалурзавай гъед тир, амма садлагьана хкахьна… Лугьудайвал, дарвилерихъни заланвилерихъ регьятвилерни гала. “Пине хъиянавай” хер, 15 йис алатанаватlани, исятдани хъуцlур гудай хьиз тlа жезма”.
КIелунар куьтягьна, яру диплом къачурдалай кьулухъ Амира гъуьлуьз фена. Гележегда хва дуьньядал акъатуни адан рикIиз еке шадвал гъана. Са йисалай цIийи хизан, А.Вагьабовадин уьмуьрдин юлдашдин дипломатвилин къуллугъдин рекьяй командировка себеб яз, Саудовская Аравиядиз акъатна. Тамам вад йисуз (2011-2016-йисар) чара уьлкведа яшамиш хьана, арабрин медениятдихъ галаз мукьувай таниш хьана, ингилис чIал, дикъетлувилелди чкадин медицина чирна. Гъурбатда хьайи девирда абурун хизан мадни чIехи хьана — Аделя ва Амаль тIварар алай рушар хьана.
“Россиядай Саудовская Аравиядиз фейила, анаг за маса дуьнья хьиз гьиссна. Ана вири Ислам диндихъ галаз алакъалу я. Инсанар регьимлубур, хъуьтуьлдаказ рафтарвилердайбур я. Москва, месела, масакlа я. Чи уьлкведин меркезда гьар сад анжах вичин къайгъуда ава. Инаг ван-сес гьатнавай са чlехи цекверин кlунтl хьиз я. Амма, гьина аватlани, жув инсанар патал менфятлу пешекар хьун хъсан кар я”, — лугьузва А.Вагьабовади.
Духтурди къейдзавайвал, медицинадин рекьяй куьмек кIанз адан патав неинки чи, гьакI къецепатан уьлквейрайни инсанар къвезва.
“Вахъ еке гележег ава”, — лугьудай заз рагьметлу бубади. И келимаяр зи девиздиз элкъвена. Эхь, инсанрал рикI алайвиляй за духтурвилин пеше хкяна”, — ихтилатзава Амира Загьировнади.
Вичин кардив рикI гваз, бажитвилелди эгечIзавайвиляй адахъ кIвалахдин юлдашрин арада гьуьрмет ава. Ада мукьвал-мукьвал пешедиз талукь жуьреба-жуьре конференцийра, форумра иштиракзава, докладар кlелзава. Кьве йис кьван я Амира духтурди “Инстаграм” соцсетда духтурвилин хсуси блог кьиле тухуз. Ачух эфирда инсанрин суалриз жавабар гузва. Ада инсанриз жув жувахъ инанмиш хьуниз, датIана чирвилер къачуниз, ибадат авуниз ва инсанар кIан хьуниз эвер гузва.
Къуй чи камаллу рушахъ рикI алай кIвалахда мадни еке агалкьунар хьурай!
К.Ферзалиев
